SHILLONG: North Eastern Hill University (NEHU)-ni Vice Chancellor Prof Prabha Shankar Shukla-na dongimin term bon·kujaskal uko ‘chutti’ watatchina Budbar salo, NEHU Students Union (NEHUSU) an·tangtangni nangnikenganiko parakataha.
Iani bidingo kobor ra·timgipa manderang baksa agangrikengon, Prof Shukla-ko chatro chatrirang, VC ong·na nangniktokjahani gimin ua university-oni re·angkamsrangon nambatgipa ong·gen ine NEHUSU-ni general secretary Toniho S Kharsati aganaha.
India a·songni President-ba NEHU-ni VC-ko chuttina watatna miksonganiko uamang knasoenga ine janapatengon, “VC-ni dikdiksana chutti ra·anganikode chinga ra·chakjawa aro uko chu·gimik ra·galsranganikosa chinga dabienga. Chingni dabianiko maikai chu·sokata uade Education Ministry-ni jakosa ong·aignok,” ine NEHUSU-ni general secretary aganaha.
NEHU-ni VC-ko kam watchina aro Registrar baksana deputy Registrar-ko ra·galchina dabie chatro chatrirangni okumu chake jingjengatani da·o sal 10 gapahachim aro uandaken Budbar salo NEHUSU-ni general secretary-koba NEHU Health centre-o donatna nangahachim.
Koborko man·soani gitade, NEHU-o so·sojengjeng ong·aniko namatna gita Prof Shukla-ko chuttina re·angna gita ge·etaniko on·china Union Education Ministry, a·songni President Droupadi Murmu-ko mol·molna tik ka·angahachim.
