SHILLONG: Meghalaya a·dokni Khasi aro Jaintia Hills jolrango bobil dake chakatenggipa Hynniewtrep National Liberation Council (HNLC) dolko ma·mong sorkari da·o bilsibongana champengdapataha aro iani bidingo Home Affairs Ministry, November 13 tariko u·iataniko on·ataha.
Home Affairs Ministry-oni u·iatani gitade, jattangko chel·chakna dakgrikenga ine a·kangenggipa HNLC bobil dol, a·doko songdongenggipa manderangko ka·mikkenatna aro an·tangtangna tangkarangko dabie ra·kuengani gimin ma·mong sorkari, ia bobil dolko bilsi bongana champengdapataha.
Tangkarangko dabie ra·na aro manderangko ka·mikkenatna HNLC bobil, salgro salaramni gipin bobil dolrang baksa bakrimani donga ine a·kangatengon, 2019 bilsini November 16 tarikoni 2024 bilsini June 30 tarikona kingking, bomarangko gopretani aro uandake so·sojengjeng ong·atani kamrangko man·chape HNLC bobil dolo ming 48 criminal case-rang donga ine Home Affairs Ministry parakataha.
Ia apsan bilsirangni gisepo HNLC bobil dolni sak 73 manderangko rim·na man·aha aro sakgittamde bame on·aha ineba Ministry parakataha.
Ministry-oni u·iatani gitade, Meghalaya sorkariba HNLC bobil dolko, Unlawful Activities (Prevention) Act, 1967 (37 of 1967)-ni niamrango pangchake, niam grigipa dol ine mingchina recommend ka·aha.
HNLC bobil dolni kamrangara India a·songni sason aro mikkimna kenna nangani ong·a ine janapatengon, ia bobil dolni kamrangko champengjagenchimode HNLC bobil dolko bilakbatatna, dam rakgipa silchidarerangko brena, ramram manderang aro sipai dolrangni janggirangko ra·taina cholrangko ra·gen ine Home Affairs Ministry parakataha.
Iandakgipa kamrangni gimin HNLC bobil dolko 2024 November 16 tarikoni bilsi bongana champengdapataha ineba Ministry-oni parakataha.