TURA: Adita salrangna skang ong·atanggipa 100 Drums Wangala manianio, Wangala A·dam Chibragre aro Garo Heritage Village-o nokdonggae on·anggipa Nokpante aro Nok-A·chikko rikaniara, A·chikrangni niamo gita ong·ja ine A·chikrangni daka rikaniko sandirikkitgipa aro itihasko name am·sandie nigipa manderangoni saksa Sembertush A Sangma parakataha.
“A·chikrangni daka rikaniko ripingna miksonge Wangala A·damo rikgipa Nokpanteara A·chikrangni chong·mot niamoni dingtangaha. Nokpante ba jekon Nokpante Kalkame ine minga, ian A·chik songrangko chel·chakna bilakgipa chin gita jakkalgipa noksa ong·a. A·chikrangni bebera·ani gitade, ia Nokpante ba bia ka·kugijagipa panterangni nokara, bobil gnalrang ba mongma, matcha aro bisigrakgipa chipukomangba chel·chakna man·a. Kalkame jang·kean ia chel·chakaniko mesokani ong·achim indiba Wangala Committee-ni Wangala A·damo rikgipa Nokpanteni jang·keo me·chikni bimangko tarianiara A·chikrangni bebera·ani baksa namen dingtanggrikaha aro iako A·chik manderang maming dakeba ra·chakna man·jawa,” ine Sembertush, suk ong·gijaniko parakataha.
Sembertush-ni talataniko on·ani gitade, Nokpanteko A·chikrang Kachari gitaba jakkala aro Nokpante-o mongma, matcha, chipu aro buga ranini bimangrangko tarie donaniara kakket bichalko mesokani chin ong·skaachim. Maiba dosko dakani gimin Nokpanteo bichal ka·ako man·gipa mandena, matburingni sastiko man·china ine ia noko tarie dongipa matburingrangni bimangko dangtape ku·mikchetatronga.
Ia Wangala A·damo rikgipa Nok-A·chikko jegalatskaengon, ia noko maming orto gri krongko on·dapaha aro ian A·chikrangni daka rikaniko dingtangatani gita ong·aha ine Sembertush parakataha.
Wangala manianirango rikgipa nokrangde A·chikrangni daka rikaniko chong·mot ong·e mesokna nanga ineba ua janapataha.
“Wangala A·dam Chibragre-o skanggipa changna Wangala manianiko ong·aton, songni manderang, jatni dakbewal rikbewalo Borangko rikahachim indiba ja·mano ia manianiko ong·atgiparang, tourist-rangko salbana gita ia Borangko dingtang taridapaha. Tourism an·chingna gamchatgipa ong·genchimoba jatni dakbewal rikbewalkode maming saloba pe·na nangja. Wangala committee-ko dilgiparang jatni dakbewal rikbewalko name ma·sichenggiparang ong·na nanga aro ia committee-ni niam bidiko seani gitade, committee-ni president, maming dakeba politician ba political-ni kamrango jak on·gipa ong·na nangjachim. Uni gimin A·chikrangni daka rikanirangko chasongni chasongna ripingangna aro mikkangchi re·banagipa chasongrangna jatni gimin mesoke on·na ian A·chik sakantinan namen mongsonggipa somoi ong·engaha,” ine Sembertush parakataha.
