SHILLONG: Budbar salo ong·atanggipa Gambegre by-election-o National People’s Party (NPP), vote-rangko salna gita sorkarini bilrangko jakkalaha ine Congress MP-ni matnanganiko Sukrobar salo NPP jegalatskaenba, ia by-election-ko NPP-ni candidate altuaen cheaigen ine a·kangataha.
“Ia by-election-o chinga manderangni bakrimanirangko man·aha aro chu·sokgipa ong·na ka·dongenga. A·bachengode ia election-o chinga bilake susagrikna nanggen ine chanchiachim indiba da·o angni nikani gitade, darangba sepange susagrikgipa dongjani gimin chingni candidate altuaen chegipa ong·aignok,” ine NPP-ni working president aro a·dokni Cabinet Minister Marcuise N Marak aganaha.
Vote-rangko salna gita sorkarini cholrangko jakkala ine matnanganiko jegalatskaengon, ia election-o NPP, namroro silroroanikosa manderangna ra·bana ku·chakaiaha aro manderang NPP-o aro NPP-ni candidate-o ka·donganiko mesokaha ine Marak parakataha.
Indake ong·engon, Gambegre by-election-o Trinamool Congress (TMC)-ni candidate mingsinggipa ong·ani gimin aro gipin a·selrangba dongani gimin result-ko uamangni nangnikani gitan mesokani cholrang donga ine parakatskaaha.
“Chinga chena gitasa ia election-o susaahachim indiba ia election-o pilakan bilakbee susaahani gimin result-kode counting-ni salosa ma·siaignok,” ine TMC-ni dilgipa aro Nongthymmai MLA Charles Pyngrope aganaha.
Apsan daken Opposition Congress dolba ia by-election-o pilakan bilakbee susagrikaha ine janapatenba, ia election-o je chegenchimoba bang·gija vote-rangchisa chena man·aigen ine parakataha.
Ia election-o pilak candidate-rangan bilakbee susagrikaha ine janapatengon, “NPP-ni candidate-ara Chief Minister-ni jikgipa ong·a aro uamango sorkarini bilrang donga. Sorkario ong·ani gimin uamang cholrang nambatenga,” ine Tura-ni Congress MP Saleng A Sangma aganaha.
“Indake ong·genchimoba ia by-election-o chingni candidate-ba bilaken susagrikaha aro da·o ian manderangni jakosa ong·aiaha,” ineba ua aganaha.
Indake ong·engon, ia by-election-o dingtang dingtang party-rangni bang·bea tangka paisa jakkalaniko mesokaha ine a·dokni BJP dol parakatskaaha.
“Gambegre-o pilak dolrangan pangchakani dongani gimin ia by-election namen bilakbee susagrikani ong·aha aro chingade ia election-o maming donggijaonisa susaaha. Chinga name a·bachengaha aro name dakna man·aha maina je manderangan namroro silroroaniko nangnike aro sorkarini on·enggipa namgnirangko man·tokjaengachim, uamangde BJP-nan pu·onaha,” ine Gambegre by-election-o BJP-ni candidate ong·e susagipa Bernard N Marak parakataha.
Ia election-o dingtang dingtang dolrang bang·en tangka paisarangko jakkalaha ine matnangatengon, dingtang dingtang party-rangni aro dilgiparangni tangka sualanirangko video-rangoba niksona man·aha ine Marak parakataha.
Marak-ni talatani gitade, BJP dolde iandake tangka paisarangko suale politics kal·anio bebera·gipa ong·ja aro pangnan rongtale politics kal·aniko bebera·gipasa ong·a.