SHILLONG: Meja Sukrobar attamo VIP-ni bolsa escort gari salpakenba chadambe saksani janggiko mangkimaatani gimin Opposition Congress Sonibaro suk ong·gijaniko aganaha aro VIP-rangna ramako watna bil donga gitan public ba ramram manderangoba apsan bil donga ine aganaha.
Meja Sukrobar attamo Cherry Blossom Festival-ona re·angmiting somoio ML05 AD 0566 motor bike-o me·chik ripetangko gate salangmitingo West Jaintia Hills-ni Nongtalang songoni Hudderfield Rymbui-ko bolsa police gari salpakenba siataha. Koboro gita VIP escort garirangoni bolsaba a·sel ong·ani somoio neng·take niangjaha aro sale katangtokaiahachim.
“Ian namen simsakgijani kam ong·a. A·sel ong·jokon sani dosichim uko nichengjana indiba a·sel ong·jokon aro a·selko chagrongjokon uamangko skang jedakoba sana bananiko dakna gita hospitalona sokatchengna. Ian namen rasong gribegipa a·sel ong·a aro jeniba escort ong·bochim, uamangni kam namen gisik grianiko mesokaha” ine Congress dilgipa aro MLA, Ronnie V Lyngdoh mejalo aganaha.
Ua agana, “ia ong·aniara manderangna namen namgijagipa kamko parakaha. VIP songreangenga ong·ode ua songreangchinachim indiba uamangoni mitamde a·selo ga·akgipako dakchakna nangachim. Chadambeni ba jeniba ong·chong janggiara namen gamchatgipa aro man·pilna amgijagipa ong·a. Uamangni kamra, darangni janggikoba dal·e ra·gijaniko mesokaha,” Congress dilgipa aganaha.
A·sel ong·atanio jeniba dosi ong·chong, dosi donggipani kosako bichal ka·na nanga, iako indin wataiani ong·ja ine aganengon, “Iako indin watpakaina nangja. VIP-nisa ine indin donaina nangja, uamangna rama watna nanga aro uagitan public-naba apsandake rama watna nanga. Anga chanchia, authority-rang driver-ni kosako bichal ka·gen, jedakoe sorkarini gisiko nanganiko ba simsakaniko manderang ma·sigen, ua aganaha.
