SHILLONG: Meghalaya-ni VIP-rang aro escort garirang pangnan ta·rake nangenggiparang dake garirangko skatang ta·rake salchipchipenga aro indake garirangko salanichi saksa mandeni gamchatbegipa janggi gimana gita nangaha ian Police escort VIP-ko re·dilangenggipa bike bolsako salpakanganichi indakgipa a·sel ong·aha aro da·o sing·anide sawa ia VIP-ara jean ramao saksa mandeni janggina bate gamchatbatgipa ong·enga.
A·sel ong·ani somoio, Tourism Minister Paul Lyngodh-ko Madan Kurlang Umroi-o Shillong Cherry Blossom Festival-ona police escort ka·angengachim ine Police official-rang Sonibar salo aganaha. Police-ni parak-atani gitade, am·sandianiko dakaha jeon bike bolsa ML-05 AD 0566 number register ka·gipa police escort baksa a·sel ong·aha aro rasonggribee bike-ko salgipa mande ramaon siaha aro unbaksa re·chap-anggipa me·chik adita jokkom ong·aha. Mamla-ko Umiam Police Station-o segataha, a·sel ong·ao bak donggipa police escort gariko ma·siaha aro rim·aha, ine agandapangaha. Police escort gariko salgipa aro sakgipin duty donggipa Constable-rangko jemang-an gario gadogiparangko ma·siaha, ine u·iataha.
Police escort gari baksa ML 05 AD 0566 bike bolsa baksa a·sel ong·a Sukrobar attamo ong·aha aro rasonggribee bike-ko salgipa mande ramaon siaha aro unbaksa re·chapanggipa me·chik adita jokkom ong·aha. Uamangko rim·a ong·-ode ine sing·anina official aganchakangaha, bilsi 7-na komie sasti donga, 35 BNSS-ni ning·o notice-ko on·angenga, ine aganaha.
Minggipin, Tourism Minister Paul Lyngdoh aganaha, ua ramao a·sel ong·gipani bidingo ma-mingkon ma·sija ine aganaha. “Anga CM-ni gari kisangmangon. CM baksa anga re·angpaani gimin anga CM-ni gariko jarikangaha, uni gariko aro police re·dilgipa garirangko jarikgipa adita garirangba donga,” ine ua aganaha.
