SHILLONG: Manipur a·doko so·sojengjeng ong·anirangko namatchipna man·jaengani gimin Manipur a·doko Chief Minister Biren Singh-chi dilenggipa sorkario bakrimaniko ra·pilna Robibar salo National People’s Party (NPP) tik ka·angaha.
Iani bidingo BJP-ni national president Jagat Prakash Nadda-na seachi u·iatengon, Manipur a·doko obostarang namjabatroroengani gimin uamang suk ong·nikjae, Manipur-o Biren Singh-chi dilenggipa sorkario bakrimaniko ra·pilna tik ka·aha ine NPP-ni national president Conrad K Sangma parakataha.
“Batanggimin sal somoirango Manipur a·doko so·sojengjeng ong·anirang batroroenganichi bang·a manderangni sianiko aro manderangni neng·nike janggi tanganiko chinga nikna man·aha,” ine Sangma parakataha.
Manipur a·doko ong·enggipa golmalrangko namatanio aro tom·tomaniko ra·bapilanio Manipur a·dokni Chief Minister Biren Singh-ni dilanichi a·dok sorkari chu·sokgipa ong·jaha ineba NPP-ni president, an·tangni suk ong·gijaniko parakataha.
“Manipur-o ong·enggipa obostarangko nike chinga Manipur a·doko BJP-chi dilenggipa a·dok sorkario bakrimaniko ra·pilna tik ka·aha,” ine NPP-ni national president Conrad K Sangma, BJP-ni national president Jagat Prakash Nadda-na sedoatgipa chittio parakataha.
