TURA: East Garo Hills a·jani Bansamgre Songgital songo Jal Jeevan Mission (JJM)-ni kamrangko name ka·jaha ine Garo Hills Youth Solidarity (GHYS), ia kamko jako ra·e contractor-ko matnangataha.
“Manderangni badi ka·aniko man·soenba chinga ia songona re·ange nion, ia JJM project-ni damgittam chi tengkirangko name rikjani a·sel be·srianirangko nikna man·aha. Manderangna chirangko sokate on·na miksonganiosa JJM-ko ma·mong sorkari ra·gatahachim indiba ia kamko ka·gipa contractor name ka·jahani a·sel iandakgipa obostarang ong·enga,” ine GHYS-ni president Endick Marak parakataha.
GHYS president-ni parakatani gitade, mongsonggipa chi tengkini ning·o leak ong·a dongani gimin songni manderang changni chang badi ka·ani ja·man, ia kamko ka·gipa contractor ia mongsonggipa chi tengkiko taridape on·ahachim indiba chu·gimik tengkiko taridapjahani a·sel ia tengkirang be·roroangahachim.
“Ia JJM project-ko matchotaha ine contractor, adita salrangna skangsan report-ko on·aha indiba kamrangko matchotani ja·man bakan ia chi tengki be·sriahani a·sel chirang joke kattokaha aro manderangni chi pipe-rangona chirang jokangjaha,” ine GHYS parakataha.
Indake ong·engon, songni manderang changni chang badi ka·doangani ja·man, ia chi tengki gita leak ong·ani dontongaha aro da·ode chi pipe-rang gita chi jokengaha ineba Marak parakataha.
Mikkangchi iandake Garo Hills-o manderangko cha·bokjachina aro kamrangko kakket ong·e ka·china gitaba GHYS mikrakataniko on·angaha.
