Hathisil Garment Manufacturing Unit-ni exhibition-cum-sales-ko ong·ata

AMPATI: South West Garo Hills a·jao Hathisil Garment Manufacturing Unit ba ba·ra sika koani karkanao tarigipa ba·ra kancha aro ma·manti gandingrangko mesokna aro palna sim·na gita Budbar salo, ia karkanani exhibition aro sales program-ko Budbar salo ong·atangaha aro ia program-ko South West Garo Hills a·jani Deputy Commissioner Hema Nayak, oprake on·angaha.
Ia exhibition-cum-sales program-ko Shillong-o donggipa Sericulture & Weaving Directorate, Handloom & Textiles Department-ni dakchakanichi ong·ataha aro ia program-ko VA Silk Industry – Apparels & Heritage Designs chalaiaha.
Hathisil Garment Manufacturing Unit-ko 2017 bilsio Union Textiles Ministry-ni dakchakanichi kuliahachim indiba 2020 bilsirango sajinmarangni a·sel ia karkanako chalaianio ja·manchakatako man·ahaoba da·o ia karkana, jolo songdongenggipa manderangna, mongsongbate me·chikrangna janggi tangani cholrangko on·na man·engaha.
Ia program-o South West Garo Hills a·jani Deputy Commissioner Hema Nayak, jinmana aganprakangengon, jolo songdongenggipa manderangko, mongsongbate me·chik aro chadamberangko ia karkanao bak ra·e an·tangtangna janggi tangani cholrangko dake ra·china didiangaha.
Ia ba·ra kancha tariani karkanara salgro salaram jolrango dal·batsranggipa karkanarangoni damsa ong·a ine janapatengon, ia karkanao tarigipa ba·ra kancha aro gipin gandingrangko chu·onga gita tarina man·ahaode aro gipin biaprangona watna man·ahaode dontongatani dongjawaha ine Nayak aganaha.
Ia program-o VA Silk Industry-ni nokgipa Vivien Sangma-ba jinmana aganprakengon, ia karkanao skie on·gipa dingtang dingtang program-rangni gimin janapangenba, ia karkanao bang·bata manderangna skie on·na kamko ka·anio dingtang dingtang neng·nikanirangkoba chagrongna nangenga ine parakataha.
Ia karkanao tarigipa ba·ra kancha aro gipin gandingrangko Hathisil unit-ni dokkanoniko aro http://www.vasitura.shop website-oniko nie ra·enba, [email protected] address-o online gita bi·atna man·gen.