TURA: Shillong songjinmani dingtang dingtang skul aro college-rango Garo skigiparangna deficit aro sorkarini kamrangko nakatatchina gita Budbar salo, A·chik Conscious Holistically Integrated Krima (ACHIK) dabiangaha.
Iani bidingo ACHIK dol, a·dokni Education Minister Rakkam A Sangma-na memorandum-koba on·ataha.
“Shillong songjinmara Meghalaya a·doko bida budiko on·anio mongsonggipa biap ong·ani gimin bang·a A·chik chatro chatrirangba Shillong-o poraitokpaenga. Meghalaya a·dokni skotong songjinmao poraienggipa A·chik chatro chatrirang bang·genchimoba bang·bata skul aro college-rangon Garo skigiparang chu·onga gita dongjani a·sel, chatro chatrirang neng·nikanirangko chagrongna nangtokenga,” ine ACHIK dolni dilgiparang, Education Minister-na sedoatgipa chittio parakataha.
ACHIK dolni parakatani gitade, iandake a·dokni skotong songjinmao Garo subject-na sorkarini gisiko nanggijaniko mesokaniara A·chikkuko mikchepani gitasan ong·aigija jattangni ku·sikko skie ra·anio A·chik chatro chatrirangna chu·onga gita cholrangko on·gijaniba ong·enga.
“Uni gimin Meghalaya a·dokni skie on·chakram biaprango, mongsongbate a·dokni skotong Shillong songjinmao, Garo skigiparangnaba deficit aro sorkari post-rangko nakatatna nangchongmotenga,” ine ACHIK dolni dilgiparang, Education Minister-na sedoatgipa chittio janapataha.