TURA: Baghmara-ni State Bank of India (SBI) branch-o bang·a manderangan Aadhar-ko on·na man·jaengani gimin bank account kulina man·tokjaenga ine Bristibar salo, South Garo Hills a·jani social activist Greneth M Sangma, an·tangni suk ong·gijaniko janapatenba, iandake bank account kulina Aadhar-ko nanganiara Supreme Court-ni dongimin niamko pe·ani ong·enga ine parakataha.
Sangma-ni parakatani gitade, bank account-rangko kulina gita Aadhar-ko nangtelgipa ong·jawa ine 2018 bilsini September jaon Supreme Court raiko on·ahachim indiba South Garo Hills a·jao bank account-ko kulina gita Aadhar-ko bi·enganiara Supreme Court-ni rai on·giminko manija gita ong·engachim.
“Bank account-ko kulina Aadhar-ko nangtelgipa ong·ataniara Supreme Court-ni dongimin niamko pe·ani gita ong·enga maina manderang sorkarini subsidy-rangko man·jaenga ong·ode bank account-rangko kulianio Aadhar-ko on·na nangjawa ine 2018 bilsini September jaon Supreme Court raiko on·manahachim,” ine Sangma parakataha.
Bank account-ko kulina Aadhar-ko bi·aniara Indian Constitution-ni Article 21-ko pe·ani gita ong·enga ine janapatskaengon, “Reserve Bank of India (RBI)-ni Know Your Customer (KYC) niamrangoba manderangni passport, driving licence, Voter Identiry Card ba NGREA job card-rangko an·tangtangni ID aro address proof-na mesokna man·gen ine janapani donga. Finance Ministry-ni u·iatani gitaba, Meghalaya a·dokara Sixth Schedule a·jani ning·o ga·akgipa biapsa ong·ani gimin a·doko songdongenggipa manderangko Aadhar-oniko watahachim,” ine Sangma parakataha.
Dr Mukul Sangma-ni Meghalaya Chief Minister ong·engmiting somoioba Aadhar-ko ra·gatjana gita tik ka·ahachim ine janapatskaengon, ia pilakko nigopenba a·dokni manderangko Aadhar-oniko watna nanga ine Sangma didiataha.
