TURA: Post-Matric Scholarship-na dorgastorangko galanio chatro chatrirang dingtang dingtang neng·nikanirangko chagrongna nangtokenga ine Zikku Balgra N Marak-chi dilenggipa Garo Students Union (GSU) parakatenba, scholarship-na dorgasto ra·chakani tarikko re·baenggipa 2025 bilsini January tarikona ra·doatchina dabiangaha.
Iani bidingo a·dokni Education Minister Rakkam A Sangma-na seachi u·iatengon, Meghalaya a·doko Post-Matric Scholarship-na dorgasto galenggipa chatro chatrirang, Parents’ Income certificate-ko tarianio dingtang dingtang neng·nikanirangko chagrongna nangtokenga ine GSU-ni president talataniko on·angenba, ia scholarship-na dorgasto ra·chakani tarikko re·baenggipa 2025 bilsini January 31 tarikona ra·doatchina mol·molataha.
“Post-Matric Scholarship-na dorgasto galenggipa chatro chatrirang, mongsongbate chel·a biaprango donge poraienggipa chatro chatrirangde, an·tangtangni ma·a paarangni income certificate-ko tarina deputy commissioner (DC) office-rangona re·bana nange, bang·en somoi aro korosrang bon·na nangtokenga. Unbaksana December-ni skanggipa antion chatro chatrirang, an·tangtangni porikkarangkoba sena nangengani gimin iandakgipa kamrango gisik on·na namen neng·beani ong·enga,” ine GSU-ni president parakatenba, ia pilak neng·nikanirangko nienba, chatro chatrirangni namgnina dorgasto ra·chakani tarikko re·baenggipa January jani 31 tarikona ra·doatchina ine Education Minister-ko mol·molataha.
