SHILLONG: Garirango siren, andalatgipa glass aro ching·brakgipa light jakkalaniko champengna gita sorkari dingtangmancha niamrangko tarigen aro manderangna maming neng·nikanirangko on·na man·jana gita ia niamrangko bilaken ja·rikanggen ine Sukrobar salo, a·dokni Chief Minister Conrad K Sangma parakataha.
“Manderangni ‘VIP culture’ ine agangipani bidingo anga bang·en badi ka·anirangko aro matnanganirangko man·soenga aro ian chanchina nangani ong·enga. Iako an·ching dingtang dingtang gadangoniba niatskana nangenga. Chel·chakani aro naljokaninaba chanchina nangani donga aro iako dakbewal dake ra·na nangja. Indake ong·genchimoba chel·chakani aro naljokna on·aniko ong·gija dake jakkala ong·ode uan namgija bewalon ong·enga,” ine Sangma aganaha.
Iani bidingo ua re·anggipa antion, Deputy Chief Minister Prestone Tynsong, Chief Secretary aro Director General of Police (DGP) baksa tom·e chanchirimanaha ine janapatengon, sawarang garirango siren-rangko, andalatgipa glass-rangko aro ching·brakgipa light-rangko jakkalna man·a, iani bidingo dingtangmancha niamko tarichina ua police department-na ge·etaniko on·manaha ine Chief Minister parakataha.
Ia niamrangko tarimanahaon, garirango siren, ching·brakgipa light aro gipin ostrorangko jakkalanio ia niamrangko rake ja·rikna nanggnok ineba Chief Minister aganaha.
Ia Standard Operation Procedure (SOP) ba niamrangko mikkang antion Cabinet-ona ra·anggnok ineba Chief Minister parakataha.
Indake ong·engon, Z plus, Z aro Y gadangrango ga·akgipa VIP-rangnade dongimin niamrang dongani gimin iandakgipa niamrangko ja·rikna nangaon ga·akaia ine Chief Minister aganskaaha.
