SHILLONG: Batanggimin November 13 tariko Gambegre by-election-o cheani ja·mano Mehtab Chandee A Sangma Butbar salo Gambegre Constituency-ni gital MLA-na ku·mikchetangaha.
Ku·mikchetaniko Assembly Speaker Thomas Sangma Assembly Secretariat-o dakataha. Chandee-ni ku·mikchetani somoio Chief Minister Conrad Sangma, aro NPP-ni mongsonggipa dilgiparang dongpaaha.
Ku·mikchetaniko dakani ja·mano koborni manderangna ua parakaha je, da·o anga Gambegre constituency gital MLA ong·e, constituency-ni manderangnni namgnina skanggipa ong·e, sana-banani biding, aro bijolini biding aroba rama-jal·ang, iarangko namdapatna kam ka·gen ine ua aganaha. Unagreba ua man·a dipete constituency-ni manderangni uo ka·dongchakaniko ba uo nichikanirangko chu·sokatna jotton ka·gen. Constituency-o manderangni chagrongna nangenggipa neng·nikanirangko amadipet namatna jotton ka·gen ine gital MLA kang·kare kae aganaha.
Batanggimin somoio election-na angni campaign ka·na re·roromiting somoio, constituency-o bang·a ja·manchakanirangko nikna gita man·aha, jedake mongsonggiparangde uan sana-banani a·bakuko namdapatna nangchongmotenga, bijoli watani, re·a-doani ra·ma jal·ang, skul nokrangni obostarangko namdapatna nanganiko nikaha, aro aganangkuode bang·en dongengkua, iarangna mongsongbate kam ka·na nanganiko nikenga, Chandee aganaha.
Gambegre-ni gitcham MLA Saleng Sangmani, Tura Constituency-oni Lok Sabha MP-na seokatako man·enba MLA-ko watangani ja·mano re·anggipa November 13 tariko by-election-ko ong·ataha.
By-election-o ua, un baksa susarimgipa gipin sakbri candidaterangko chebaaha.
Mehtab, saksa medical professional, Gambegre by-election-o chebaenba skanggipa changna political a·bao ga·dapeaha.
Gambegre by-election-o Mehtab Chandee-ni chebaani ja·mano da·o dipet NPP-chi dilenggipa MDA sorkario, United Democratic Party (UDP)-ni sak 12 MLA, Bharatiya Janata Party (BJP)-ni sakgni, Hill State People’s Democratic Party (HSPDP)-ni sakgni, aro sakgni Independent MLA-rang bakrimenga.
Indakeba nikatna man·a je, re·anggipa 2023 bilsini Assembly election-o NPP, ge 26 seat-rangko cheahachim indiba uni ja·man People’s Democratic Front (PDF)-ni MLA sakgni aro ia bilsini gisepo Congress dolni MLA sakgittamba NPP-o bakrimeaha.
Chandee baksade sak 60 Member Meghalaya Legislative Assembly-o me·chik legislator-rangni bilakani sakbri gapaha.
