SHILLONG: North Eastern Hill University (NEHU)-o kam ka·enggipa dolrang aro chatro chatrirang pilakan nangniktokjaengahani gimin Vice Chancellor Prof Prabha Shankar Shukla, kamtangko wate re·angon nambatgipa ong·gen ine BJP-ni dilgipa aro a·dokni Cabinet Minister AL Hek aganaha.
NEHU-o ong·enggipa obostarangni bidingo ma·mong sorkari baksa agangrikna gita adita salrangna skangsan ua, a·dokni BJP dilgiparangko New Delhi-ona re·dilangahachim aro uni kobor ra·timgiparangna aganani gitade, NEHU-o skigiparang, poraienggipa chatro chatrirang, kam ka·giparang aro pilakan Vice Chancellor-ni kosako re·engani gimin ua an·tangni kamko wate re·angon nambatgipa ong·enga.
Kobor on·anio pangchake, ia vice chancellor, University-o kam ka·angkua ong·ode NEHU-o kamrangko name ka·na man·chipjawaha ineba Hek aganaha.
Adita salrangna skangsan a·dokni BJP dilgiparang, Education-ni Union Minister of State-ko grongenba, NEHU-o ong·enggipa obostarangni bidingo agangrikangahachim.
Ia tom·anio Union Minister-ba, a·dokoni re·anggipa BJP-ni dilgiparang baksa agangrikengon, VC-ni kosako matnanganirangko sandirokna gita ma·mong sorkarini songe on·gipa inquiry committee-ni bidingo janapatskaaha.
Ia inquiry committee-ko UGC-ni gitcham Chairman Prof DP Singh dilangaha aro ia committee, sandirokna nanganirangko matchotenba, Mongolbar salon New Delhi-ona re·angpilaha.
Ia inquiry committee-ni report-ko da·al November 29 tariko, Education Ministry-na pakwatnaba gnang ine ka·dongsoenga aro iana NEHU-ni chatro chatrirang, skigiparang aro dingtang dingtang dolrangba nichaksotokenga.