SHILLONG: Mikkang bilsio ong·atna sienggipa KHADC aro JHADC election-o susagniko a·dokni Trinamool Congress (TMC) talbrekujaenga ine u·iataha.
“Da·o dipet chinga an·tangtangba iani bidingo chanchia dongkuja aro high command-oniba maming u·iata dongkuja,” ine TMC-ni state president aro Nongthymmai MLA Charles Pyngrope parakataha.
Pyngrope-ni aganani gitade, da·o dipet TMC-ni state executive committee, district council election-ni bidingo chanchirima dongkuja indiba da·o Gambegre by-election matchotmanahani gimin ia committee, mikkang antirango tom·e chanchirimani cholrang donga.
Meghalaya a·doko ong·atna sienggipa autonomous district council election-ni bidingo ua TMC-ni general secretary Meghalaya in-charge Manas Bhuyan-na u·iatgen ineba Pyngrope aganaha.
“Una u·iatani ja·man uni ku·pattianio pangchakesa chinga kamrangko ka·chakatgen,” ine ua aganaha.
District council election-rangko mikkang bilsion ong·atani ong·engahani gimin a·doko dingtang dingtang political dolrang da·onin kamrangko ka·na gita a·bachengtokengahachim ine nikna man·a.
District council election-na Voice of the People’s Party (VPP)-de adita salrangna skangan candidate-rangkoba parakatahachim. Apsan daken United Democratic Party (UDP)-ba ia district council election-na candidate-rangko sandina a·bachengengaha.
Congress dolba ia district council election-na candidate-rangko seokna gita songadam nokadamrango kamrango a·bachengatskaengahachim.
Ia District Council election-o susana gita National People’s Party (NPP)-ba chu·gimik tarisamsomanaha ine janapatengon, BJP dolni gitade, ia election-o chenagipa candidate-rang donggenchimosa susana manchiskaenga.
 |
ReplyForward
|
