Riangdo-Athiabari-Hahim rama gita truck garirangko watjachina dabitoka

BOKO: Assam-oni Meghalaya a·doko naegipa Riangdo-Athiabari-Hahim-Boko ramako da·o indita bilsirangni ja·man gital dake taritaiengahani gimin, ia rama gita bostu salgipa truck garirang re·rurataigenchimode ta·raken ia rama nosto ong·piltaigen ine ia jolrango songdongenggipa manderang, ia rama gita dal·dalgipa truck garirangko re·na on·jachina dabiangtokaha.
“Bilsi 19-ni ja·mansa oa Riangdo-Athiabari-Hahim-Boko ramako taripiltaienga aro da·o ia ramako taria matchotkujaengon, dal·dalgipa truck garirang, mongsongbate koela salgipa garirang, ia rama gita re·na a·bachengtaiengaha ine chinga nikna man·aha. Ia rama gita da·oba koela salgipa garirang salantian re·rurataigenchimode ia gital tarigipa rama ta·raken nosto ong·pilaigen,” ine Umsohpieng songni saksa Dering Tyrsa aganaha.
Ia rama gita dal·dalgipa garirangko, mongsongbate koela salgipa truck garirangko watjachina dabie Bristibar walo, Assam-Meghalaya simao donggipa West Khasi Hills a·jani Umsohpieng, Myndo, Mawtirang, Pursohan aro uandakgipa songni manderang, ramao jingjengatanirangkoba dakangtokaha.
“Truck garirang dongimin niamko ja·rike bosturangko salgenchimode chingo maming neng·nikanirang dongjawachim. Chinga ia rama gita nangana bate bostu salgipa garirangni re·ruraanirangko nikaha aro koela salgipa garirango sing·on, uamangba truck garirang nangana bate koelarangko salenga ine ku·rachakaha. Uni gimin iako chinga raken jegala aro iandakgipa garirangni re·ruraaniko ta·raken champengna nangchongmota,” ine apsan songni Pynshai Lyngdoh aganskaaha.
Ia ramara Assam aro Meghalaya a·dok damgniko nangdimeatgipa ramaan ong·ani gimin ia rama tarianiko chu·gimik matchotchengna on·genchimode ian a·dok damgninan namgni ong·gen ineba songni manderang aganaha.
“Chinga Meghalaya a·dokchipak donggipa songni manderangde, sagipa ding·gipa manderangko Boko ba Nongstoin-ona salangna nangon ramarang namjae namen neng·nikanirangko chagrongna nangronga aro da·alo ia ramako tarina a·bachenganiara chingna ka·donganiko ra·baani gita ong·engachim. Indiba ia ramako taria matchotgijan koela salgipa garirang re·ruraahaode, ia rama ta·raken nosto ong·piltaignok,” ine songni manderang parakataha.
Riangdo-oni Hahim-ona kilometre 37-mang ong·gipa ramako 2021 bilsio tarina a·bachengahachim ine nikna man·a aro iana skangde ia ramani obosta namen namsrangjahachim.