Tura: GSU-ni president Tengsak Momin, December 7 tariko District Selection Committee (DSC) porikkako ong·atna tarikko donani gimin ortoko sing·doaha maina ia apsan salon gipin professional aro competitive exam ba porikkarangko ong·atenga.
“Gipin porikka dongani somoio DSC porikkako ong·atanio maiba donnuani ba orta gnangode iako ra·chakna man·jawa. DSC porikakko ong·atgiparang, name dake chanchie porikkako ong·atna nanga. Gipin porikka dongani apsan somoin ong·ata ong·doe candidate-rang maidake somoiko rikna man·gen, aro cholrang komia ine Tengsak aganaha.
Dec 7 tariko LLB, NEHU MA, BA porikkarang donga, uni gimin Tengsak, DSC porikkako apsan somoio ong·atani gimin namnikgijako parakaha.
Uni gimin DSC porikkako Dec 7 tarikna skang ba ja·man ong·atchina aganaha. Jeadakode porikkako sena kragipa gimik candidate-rangan porikkao asongna man·gen.
Minggipin OT services-o contractual kam ka·giparango saksamangba Garo representation dongjani giminba Tengsak sing·doaha.
“OT aro ICU technician-na college poraia matchotdaldalgiparangkon rakkienga indiba Garo candidate-rangko nichangenga. Garo Hills-oni bang·a Garo/A·chik chadamberang Medical aro electronics-o polytechnic diplomas donggiparang bang·a. Covid-ni somoio jemangan mikkangchake donge dangdike on·giparangko NPP sorkari de·mittelahachim uamangko da·ode ra·galenga ine Tengsak aganaha.
“GSU, kamna kragipa Garo candidate-rangko uamangni poraia aro changa-sapani kri kamrangko rakkina dabigen. Bang·a kamna kragipa Garo candidate-rangko kamo rakkijaenga, uni gimin chinga iako nirokchina dabigen. CM an·tangba Garo ong·a, uni gimin ua Garo chadamberangna cholrangko on·na nanga ineba Tengsak agankuaha.
