Tura: Garo Hills-ni dal·batgipa music platform Me’gong festival-ko Paul Lyngdoh, damgittam a·songrang Uzbekistan, El Salvador aro Jamaica-ni ambassador-rang baksa West Garo Hills Jengjal sepang Baljek Airport-o hajal manderangni dongpaanio a·bachengate on·aha.
Me’gong fest-ni 4-gipa edition-o Haystack Ladies, Da Suraka, Gajendra Verma aro Euphoria, gitcham actor Udita Goswami- uamang git ring·angaha.
Ia festival-ko tourism department pangna bilsian local ba jolni music aro culture-ko namdapatna ba mikkangchina ra·dona miksonganio ong·atronga. Ia bilsisa skanggipa changna ticket-rangko palaha.
Sukrobar salni programo Garo Hills-oni me·chik band-rang, Haystack Ladies jinma manderangni mikkango git ring·mesokangaha. Uamangni ja·man jolni Garo group Da Suraka, uamangni gitrangko ring·angskaha.
Niksenggipa singer Gajendra Verma (Emptiness, Isme Tera Ghata-ko ring·gipa), uni ring·gipa mingchiking gitrangko ring·aha. Manderang an·sengbee bak ra·angaha.
Verma-ni git ring·a matchota ja·man festival-ko tourism minister Paul Lyngdoh, mongsongipa sokachakgipa ong·e Uzbekistan-ni ambassador Sardor Mirzayusupovich Rustambaev, EL Salvador-ni ambassador Guillermo Rubio Funes, Jamaica-ni ambassador Jason K M Hall- uamang baksa bakko ra·angaha.
Iarangni gisepon salgnina ong·atgipa event ba tom·anio cha·ani-ringanirangko palgiparangkoba bang·en nikna man·aha.
Me’gong festival-ko ong·atao pangna bilsian bang·en manderang bak ra·na re·toka, bilsi 2022-o mingsinggipa international band MLTR aro Big Mountain-ko rimbaaha, uno lak 2.6 manderangko festival- o nikna man·aha. Meja bilsio lak 3 baten manderang Vengaboys aro Bollywood-ni Arman Malik-ko nina re·batokaha.
Ia bilsiba Swedish rock band Europe-ni ring·mesokako nina bang·e manderang re·baaha. Iarangni gisepon festival-o Garo jatni man·e cha·begipa daka-rika bewalrangko, chrokmesaani, cha·ani-ringani, kal·susaani aro Garo-rangni janggi tangani bewalrangko mesokataha. Festival-ni bon·kamgipa sal Sonibar salo Chief Minister Conrad Sangma aro Speaker Thomas Sangma – uamangba bak ra·angaha.
