SHILLONG: Da·o ding·chaoenggipa NEHU-ni mamla, Vice Chancellor Prof. Prabha Shankar Shukla-ko ra·galani baksa dal·batsranggipa chanchiani bak ong·e a·dokni BJP, Meghalaya-ni Governor CH Vijayshankar baksa mejalo chanchigrikaha.
Cabinet Minister aro BJP-ni a·gipi dilgipa, AL Hek-chi dilenggipa delegation ua mamlako namatna ja·kurangko de·angani gimin chanchigrikaha.
BJP-ni delegation ru·utgija salo a·songni skotongona re·ange education Ministry baksa agangrikani gimin Hek agan-talataha.
“Uno chinga NEHU-ni bidingo kontasamangna ru·uten agangrikaha. Ua obostako namatchina ja·kurangko de·angchina chinga de·e mesokaha. Governor-ba uani gimin ma·simanaha indiba chinga ua obostako namatna kragipa ja·kurangko de·ani gimin chanchigrikaha,” State BJP chief ku·wattimgipa, Mariahom Kharkrang aganaha.
Committee-ni report-ko sengenga aro uko ra·chakna nanggen, University-ni namgnina ua golmalko namataniona ra·bana BJP jotton ka·enga, ua aganaha.
University-ni gisepo chalaia aro administrative tik ong·ja ine matnanganiko sandina Education Ministry, sakgni membor committee-ko songaha.
NEHU VC-ni kamko watode ine sing·anina aganchakao ian mongsonggipa chanchiani ong·a uni gimin chinga chanchigrikaha ine aganaha.
BJP a·gipi dilgipa AL Hek mija Bristibar-o indake aganaha NEHU Vice Chancellor Prabha Shankar Shukla, uni kosako university-ni pilak daitoko jako ra·giparangni matnangani gita ua re·angna nangchongmota.
Hek, jean ru·utgija salo Meghalaya BJP-ni delegation-ko institute-o ong·enggipa golmalni bidingo ma·mong sorkarina janapna Delhi-ona re·dilangaha, VC-ni kosako skigiparang, chatro-chatrirang aro gipin daitoko jako ra·giparangni matnange seegipa report-ko on·aha.
Report-rang kakket ong·ode, da·o jegalako man·gipa Vice Chancellor NEHU-o ong·angkuode NEHU-o tom·ani ong·kujawa ine ua aganaha.
