Badiaba manderangni kragija dake mesokanina suk ong·gijaniko paraktoka
TURA: A·gilsak gimiko mingsing minggamako man·gipa Europe dolni ga·subee gitrangko ring·e mesokanganichi Sonibar attamo, salgnina ong·atanggipa Me·gong Festival-ko matchotataha.
Ia festival-ko Sukrobar salonin ong·atangahachim aro ia salgnina ong·atanggipa festival-o manderang, namnamgipa dolrangni git ring·e aro doke dam·e mesokanirangko nikangan baksana dingtang dingtang cha·ani ringanirang aro dingtang dingtang bosturangkoba nikna aro brena cholrangko man·tokaha.
Gnigipa attamo, Europe dolni gitrangko ring·e mesokanganichi ia festival ba manianiona re·bagipa lakni lak manderang, chrok mesae rona aro uamangni namnamgipa gitrangko ring·pana cholrangko man·tokaha.
Indake ong·genchimoba, ia bon·kamgipa attamo, mitam manderangni kragija dakanirangkoba nikna man·aha aro iana bang·a manderangan an·tangtangni suk ong·gijaniko parakattokaha.
Mitam manderang, dongimin niamrangko pe·e, kragija kamrangko ka·ahani a·sel ia festival-ko nina re·bagipa aro ong·atgipa manderangnaba kenchakna nanganirangko ra·baaha.
Kobor on·timgipa manderangni aganani gitade, mitam manderang, Super Fan Arena-ona dakanggipa barricade ba kapenggipakon pe·drae jinma nappruangaha aro iani a·sel mikkango suk ong·e nipaenggipa manderangna dontonggijani aro kenchakna nanganirangko ra·baaha.
“Chingaba tikit ra·esa mikkango maming neng·nikani gri nina man·paengachim indiba Europe dolni gitrangko ring·na a·bachengon mitam manderang chu peke, skatang napprubatokaha aro chingni niako namen golmal ong·ataha,” ine Super Fan arena-o nigipa me·chikrangoni saksa aganaha.
Indake ong·engon, mitam manderang, tikit palgipa counter-koba pe·draeaha aro counter-o asonggipa manderangkoba chadrapna jotton ka·aha ine kobor on·aha.
“Ian an·ching Garo Hills-na namen nitogijani aro kratcha·na nanganiko ra·baaha. Gimik program-kode an·ching indin nina man·ja aro basakobade an·ching tikitkoba ra·e nina nanga. Da·alo an·ching namen rasong gnanggipa ong·aha maina an·chingona a·gilsak gimik mingsinggipa Europe band-an re·baaha. Iandakgipa band-ko nina an·ching gong 299-mangmangkoba koros ka·na siktokjama?” ine Europe band-ni git ring·ako ka·oksibee nina re·anggipa me·apa saksa aganaha.
Me·gong Festival ong·atchakgipa biapo botolrangko kragija dake gopee galtokahani giminba bang·a manderangan suk ong·gijaniko parakattokaha.
“Iara maiko miksongenga? Sani biapo iandake botolrangko gopeenga aro sana iara namgijako ra·bana sienga? An·ching Garo Hills-o donggipa manderang an·tangtangan indake mesoka ong·ode sana kratcha·na nangani ong·enga? Botolrangko gopeanichi gipin biaprangoni re·bagipa manderangna jatni mai namgipa gunko mesokaha?” ine ia Me·gong Festival-o dokkan dakgipa A·chik me·chik saksa sing·doataha.