TURA: West Garo Hills a·jani a·kawe jolrango rang·san mi bitchilrang dam tang·doahani a·sel songni nokni manderang, mongsongbate game ge·e cha·enggipa manderang neng·nikanirangko chagrongna nangtokenga ine All Meghalaya Minority Students Union (AMMSU) parakatenba, game ge·e cha·enggipa manderangna Agriculture department-ni gita dakchakanirangko on·china didiataha.
Iani bidingo West Garo Hills a·jani Deputy Commissioner-na sedoatengon, West Garo Hills a·jani a·kawe jolrango donggipa Tikrikilla, Nidanpur, Chibinang, Phulbari, Old Bhaitbari, New Bhaitbari, Ammabazaar, Rajabala, Hallidayganj (Singimari) aro uandakgipa pilak biaprangon mi bitchilrang rang·san dam tang·doahani a·sel game ge·e cha·enggipa manderang neng·nikanirangko chagrongna nangtokenga ine AMMSU parakatenba, ia jolrango game ge·e cha·enggipa manderangni namgnina sorkarini gita dakchakanirangko on·china didiataha.
“Ia sal somoirango rang·san mi bitchilrangni dam tang·doahani a·sel game ge·e cha·enggipa manderang, mi bitchilrangko brena chol ong·tokjaenga aro uandaken mitam manderangde, janggitangtangna kenchake, tangkarangko srona a·bachengtokengaha. Iandake mi bitchilrangni dam tang·doaniara game ge·e cha·enggipa nokdangrangnasan neng·nikaniko ra·baenga ong·ja indiba mikkangchi cha·ani bosturang chu·ongjana kenchakna nanganiba ong·enga,” ine AMMSU parakataha.
Meghalaya a·dokara gama ge·anio pangchakbatgipa a·dokan ong·ani gimin game ge·e cha·enggipa manderangni neng·nikanirangko ta·raken namatna nangenga ine janapatengon, mi bitchilrangni damko komiatna gita ta·raken ja·kurangko de·china ong·jaode, game ge·e cha·giparangni neng·nikanirangko namatna gita tangka paisarangko dakchake on·skachina AMMSU didiataha.
“District Agriculture Office-ni dakchakanichi an·ching game ge·e cha·enggipa manderangni neng·nikanirangko namatna ku·cholsan jak on·pana man·gen,” ine AMMSU-ni president parakataha.