SHILLONG: Congress dolko wate katgipa Trinamool Congress (TMC)-ni dilgiparang, Congress dolona re·bapiltaina miksongenga ine jangbingbanganirangko knasona man·engon, TMC-ni state president Charles Pyngrope, 2028 bilsini Assembly election-na skang Congress dolo nappiltainaba gnang aro ua re·bapilahaode a·dokni gitcham Chief Minister aro TMC-ni dilgipa Mukul Sangma-ba Congress dolona re·bapilgnok ine Meghalaya Pradesh Congress Committee (MPCC)-ni president Vincent H Pala parakataha.
“Ua re·bapilgenchim ong·ode anga uko rimchaksoenga indiba da·o dipet anti-defection law dongani gimin ua re·bapilna man·kujanaba gnang. Anga ka·donga ua 2028 bilsio Congress dolona re·bapilgen. Charles (Pyngrope) Congress dolona re·bapilahaode Mukul (Sangma)-ba re·bapilaignok,” ine Pala aganaha.
Ia sakgni dilgiparang, a·dokni Congress dol baksa agangrikarang dongama ine sing·anina aganchakaniko on·angengon, “Anga Charles-kode ripengska ong·e grongeronga indiba Mukul-kosa gronggija ru·utengaha,” ine Pala aganaha.
Congress dolona re·bapilna miksongenga ine jangbingbanganiko TMC-ni state president Charles Pyngrope-de raken jegalatskaaha aro ua an·tang saksanan party gita ong·aiani gimin Congress dolo nappilna chanchianirangba dongkuja ine talataniko on·angskaaha.
Adita salrangna skangsan TMC Nongthymmai block-ni sak 1300 membor-rang, Congress dolo napangani ja·man TMC-ni state president Charles Pyngrope-koba Congress dolo nappiltaiani cholrang donga ine bang·a manderangan chanchichipanirang ong·katahachim.
“Uamang angko wate re·angaha aro anga uamangko champengna bil dongja. Indide anga maiko dakbo?” ine Pyngrope sing·doataha.
Congress-o napna gita ua MPCC-ni president Vincent Pala-ni ong·kataniko sengengama ine sing·anina aganchakaniko on·angskaengon, ua an·tangde jemingba kam ka·rimna kusi ong·aia indiba da·o dipet darangba uko gipin political dolo napchina didia dongkuja aro ua an·tangba gipin party-rango napna chanchia dongkuja ine TMC-ni state president parakataha.
Indake ong·engon, MPCC-ni president Vincent Pala, 2028 bilsionan a·doko party-ko dilna nangnikkuenga ine parakatskaaha.
