Gital political party-ko bikotani chol donga: Mukul
SHILLONG: Meghalaya a·doko Trinamool Congress (TMC)-ni dilgiparang, Congress dolona re·angpilna miksonganirang dongenga ine jangbingbanganirang aro Meghalaya Pradesh Congress Committee (MPCC)-ni president Vincent H Pala-ba parakatani ja·man, iako a·dokni gitcham Chief Minister aro TMC-ni dilgipa Mukul Sangma raken jegalatskaaha.
Congress dolona re·angpilna miksonganirang donga ine jangbingbanganirangko jegalatengon, ua Congress dolona re·angpilna miksonganiba dongja indiba nanggenchimode mikkangchi gital political dolko bikotani cholrang donga ine Sangma parakataha.
Da·o sorkariko chalaienggipa dolrangni kosakosa ua chakatna jotton ka·enga ine janapatskaengon, Congress dolba NPP baksa jak donggipa party ong·a ine Sangma matnangataha.
Meghalaya a·doko Congress dolde miksongani grisa re·mikkangenga ine janapatengon, manderangni mikkangode pangnan Congress dolni dilgiparang dingtang dake aganronga indiba janggilode NPP aro Congress dolni gisepo melie kam ka·ani donga ine TMC-ni dilgipa aganaha.
KHADC-o NPP aro Congress dolrangni bakrime kamko ka·engani gimin janapatskaengon, ua an·tangde a·dokko riknasa miksonganirang baksa kam ka·enga ine Sangma parakataha.
Ia kamni ning·o MPCC-ni president Vincent Pala jak dongama ine sing·anina aganchakaniko on·angengon, ua darangkoba miksonge aganenga ong·ja indiba ua da·o sorkariko chalaienggipa party-ni kosakosa chakatenga aro NPP baksa Congress-ba jak donga ine Sangma matnangataha.
“Manderangna dangdike on·na gita anga maina Congress-ona re·angpilna nanggen? Angni politics-ko a·bachengon anga saksa jakgitelgipa ong·esa a·bachengaha aro anga manderang baksasa bakrime a·bachengonin kamko ka·baenga,” ine Sangma aganaha.
Ua an·tangni political party-ko bikotskana miksongengama ine sing·on, iandake chanchichipanikode ua jegalna nangnikjaenga ine a·dokni gitcham Chief Minister aganaha.
A·doko maming namroro silroroaniko ra·baja aro manderangna janggi tangani cholrangko on·ja ine NPP-chi dilenggipa MDA sorkariko matnangatengon, ia sorkari, ramram manderangni janggi tangani cholrangko ka·sine ra·gopangaha aro an·tangtangni manderangnasan cholrangko on·aha ine Sangma parakataha.
TMC-ni state president Charles Pyngrope-ko Congress-ona re·angpilnaba gnang ine jangbingbangenggipani gimin sing·skaon, ian warachakna sikgija an·tangtangni bame on·na sikgipa manderangni giminsa ong·enga ine Sangma aganaha.
“Anga an·tangde indakgipa mande ong·ja,” ine ua aganaha.
