RESUBELPARA: Ja·manchake kobor man·soani gitade, re·anggipa Budbar attamo, motorcycle bolsa, North Garo Hills a·jani Resu Dekachang dolo gitalchina re·ekgipa ku·mango, police-rangni truck gari bolsa baksa chatinggrike a·sel ong·aha aro ia a·sel ong·anio motorcycle-ko salgipa mande siangna nangaha.
Ia a·sel ong·ani Budbar attam 6:00 aro 7:00 bajimangni gisepo ong·aha aro a·sel ong·anio sianggipa mandeara Resu Daram songoni Baiju M Sangma minggipa mande ong·achim.
Kobor on·timgipa manderangni u·iatani gitade, a·sel ong·ani somoio ia mande helmet ganjachim aro an·tangni motorcycle-koba ta·raken salachim.
A·sel ong·e sianggipa mandeko post mortem ka·jachina nokdangni manderang mol·molahani gimin ja·mano District Administration-ni permission-ko man·e sianggipa mandeni manggisiko post mortem ka·gija nokdangni manderangna pakwate on·ataiaha aro uko Bristibar pringo, uni songon gope galaha ine kobor on·aha.