SHILLONG: Chief Minister Conrad K Sangma Budbar salo, Shillong songjinmao donggipa Lemon Tree Hotels Ltd-ni Aurika Hotel-ko a·dokni Chief Minister Conrad K Sangma nokdonggae on·angaha aro ian a·dokni gittamgipa five-star hotel ong·enga.
Ia hotel-ko PPP model-o rikaha jeon 130 biaprang donga aro ia hotel-ko rikanio tangka gong kror 124 koros ong·aha.
Orchid Hotel, Polo sepango ong·gipa program-o, Sangma ia project-ni namgnini gimin aganengon, PPP-ni dal·batsranggipa a·doko chu·sokani ine aganaha. Orchid Hotel-ko Aurika Hotel-ona taridapaniara, songrebagiparangnaba namgipa chol ong·gen aro chadamberangnaba uano kamrangko ka·na namgipa chol ong·gen ineba Chief Minister agandapkuaha.
Chief Minister-ni aganani gitade, tourism sector-na koros ka·anio, lak 1 batpile kamrangko a·doko ong·katatna ka·dongsoenga. Uamangming meligrikanichi, Lemon Tree Hotels Ltd gong kror 5-ko down payment dake Meghalaya Tourism Development Corporation (MTDC)-na bilsini bara gong kror 2.05 baksa aro hotel-oni je tangka man·aoniko 1%-mangni gita ba gamgen ine ku·chakaha.
Ia kattarangna gisiko nangrikengon, CM, indake dakanichi MTDC-ko chalaianio tiktak ong·gipao, sorkarini on·aniko nanggijan man·aigen ine aganaha. Ia luxury hotel-o dal·gipa hall aro gipin cholrangchi dal·dalgipa tom·anirangko aro MICE tourism-naba namgipa chol ong·gen.
Iarangko aganengon CM, namgipa aro bilakgipa tourism ecosystem-ko Meghalaya-o ong·atna gitaba mikkangchi dal·dalgipa project aro program-rangnaba miksonge aganjolaha. Unbaksana sorkarini, Shillong Airport runway-ko dal·dapatna kam ka·engon, India-ni dingtang dingtang biaprangona joljol bilna man·a gita biaprangko apalatchina jean a·doko tourism aro a·songna namgipa chanchisoani ong·enga.
Indake CM, tourism sector-ko namdapatna aro dal·daproroatna gita jako ra·e kamko ka·enggiparang aro a·songni manderang sakantikon iana dakchakpaaniko on·china didianiko on·angaha.
