TURA: Salgittamna Tura-o ong·atanggipa North East Riders Meet (NERM) 2024, Sonibar attamo matchotangaha.
Ia bilsini NERM-ko Tura-ni NH-51 R.E.B.E.L.S, December 5 tarikoni December 7 tarikona, Tura-ni rikamo donggipa Dodinanggre songni Asibra Estate-o sokachakaha aro ia Riders Meet-ona salgro salaram a·dokrangonisan ong·aigija India a·songni dingtang dingtang biaprang aro Nepal aro Bhutan a·songrangoniba sak 3,000-na baten biker-rang re·bae bak ra·angtokaha.
Ia salgittamna ong·atanggipa NERM-o dingtang dingtang program-rang, jekai camping, dingtang dingtang jatrangni dakmesokani, kal·susaani aro mingsinggipa dolrangni concert-rangkoba ong·atangaha.
Ia Riders Meet-ko ong·ataniona dingtang dingtang biaprangoni re·bagipa biker-rang, Garo Hills-ni mingsinggipa aro rona rotogipa biaprangonaba re·ange nina cholko man·aha aro A·chikrangni daka rikanirangkoba nie ra·na cholko man·aha.
Skanggipa salo registration ka·chenge bak ra·giparangna A·chikrangni dakbewal gita chu bitchiko on·angaha aro uni ja·man NH-51 R.E.B.E.L.S, Asibra-o public toilet-ko oprake on·angaha. Indake attamangahaon ga·subegipa band-rang jekai, Strange Origin, Sonic Fusion, aro High Volt dolrang, ga·subee ring·mesokangaha.
Gnigipa salo, ia NERM-o bak ra·giparang, Nokrek Biosphere Reserve, Darikbokgre-ona re·angaha aro Wangala chrokanirang baksana jatni kal·susaanirangkoba ong·atangaha. Indake attamchipak, Titans, Thunder’s Cave, Dwar aro Ahaia dolrang, ga·subee ring·mesokanganichi ia program-o bak ra·giparangko an·saotangaha.
Bon·kamgipa salo biker-rangni bilakaniko nina strongman competition-ko ong·atangaha aro dingtang dingtang kal·susaanirango bak ra·e chegiprangna boksisrangko sualangaha. Ia bon·kamgipa attamoba, Restless Desire, Colours, Imprints, aro Bombay Vikings dolrang, gitrangko ring·e manderangko an·saoatangaha.
Re·baenggipa 2025 bilsiode ia NERM-ko Arunachal Pradesh a·doko 30 North Motorcycle Club sokachakskagen ine bon·kamao jinmana parakataha.
