SHILLONG: Asha aro Anganwadi workers dakgipa mikkangchake kam ka·giparangni dormahako bariatchina gita A·dok Sorkarirangko ge·etatchina gita Tura MP Saleng Sangma, Ma·mong Sorkariko didiaha.
Iarangni bidingo Tura MP Saleng Sangma Indian Association of parliamentarian on population and Development-ni Standing Committee-ni tom·anio janapaha.
Sangma indake aganaha, jensomoio ua songo-noko oko donggipa me·chikko nikon, ia oko keenggipa me·chikara uni degipako mikkang nikaona tanggenma ine kenchakgipa sing·anirang uni gisikona nabaa.
“Songadam-nokadamrango, bang·a an·o donggipa me·chikrangan vitamin deficiency ba vitamin chu·onggijanirangko man·a, maina uamangoni bang·batan kangal-cholgrirang ong·ani gimin namnama vitamni gnanggipa cha·anirangko man·ja,” Sangma aganaha.
Ua indake aganaha je, an·tangtangko kang·kare kae aro kamtangko gisiko nange ka·na gisiko nangatna gita ASHA aro Anganwadi worker-rangni dormaharangko bariatchina gita A·dok Sorkarirangna didiataniko dakchina ine Tura MP, Ma·mong Sorkariko mol·molaha.
Damberangni an·o keani aro bi·sarangni an·seng-baljoke dal·na man·gijani bidingo kamrangko ka·na gita Parliamentarian-rangni daito ba dakgnini bidingo tom·anio mongsongbate chanchiaha.
