SHILLONG: Khasi Hills Autonomous District Council (KHADC)-o NPP-ni chalaienggipa EC-oni, Congress party da·o salsa salgnini gisepon ong·katnaba donggnok.
Party-oniko kobor man·ani gitade, srangsrang parakjagenchimoba EC-oni ong·katna ning·joljol MPCC, AICC-o chanchiaha aro sakgni MDC-rangba chanchiaha.
Party-ni MDC sakgni Ronnie V Lyngdoh aro PN Syiem, uamangni chanchianiko salsa salgnini gisepon party-na parakgen ineba party koboro parakaha.
Koborogita, EC-oni ong·katchina gita MDC sakgnikoba namen didiengaha aro AICC-ba ia MDC sakgniko EC-o bakrimangkuako nangnikjaha.
Indakeba nikatna man·gen je, KHADC-o bakrime rikenggipa EC-oni ong·katchina gita da·o Deputy CEM aro Lyngdoh-ko ge·etatchina ine, District Congress Committees (DCCs)-ni president aro party-ni frontal wing, AICC secretary in-charge Meghalaya, Dr A Chella Kumar-na lekka seatahachim.
