WILLIAMNAGAR: Bristibar salo, A·chik matgrik Pa Togan Nengminja Sangma-ni chang 152-gipa siani salko East Garo Hills a·jani Chisobibra songo gisik ra·e maniangaha aro ia salko manianio, a·dokni PHE Minister aro Williamnagar-ni MLA Marcuise N Marak, mongsonggipa sokgipa ong·e bak ra·angaha.
Ia salko manianio, a·dokni PHE Minister Marcuise N Marak, jinmana aganprakangengon, British-rangni sasononiko jakgitel ong·atanio Pa Togan Nengminja Sangma-ba India a·songna bang·en on·gilaha aro uan A·chikrangko gipinrangni sasononi jakgitel ong·e dongn didigipaba ong·aha ine parakataha.
Ia salko manianio dongpae jinmana aganprakanggipa gipin manderangara, Garo Hills Autonomous District Council (GHADC)-ni Chief Executive Member Albinush R Marak, GHADC-ni Deputy CEM Nikman Ch Marak, Pa Togan Nengminja Sangma Mahari Association (PTNSMA)-ni president aro gipinrang ong·a.
Mittelpilani kattarangko secretary Arun N Marak aganangskaaha.
