SHILLONG: Meghalaya a·dokni skotong Shillong songjinmao rock concert aro uandakgipa doka dam·ani program-rangko ong·atanina Voice of the People’s Party (VPP)-ni matnanganiko a·dokni Education Minister Rakkam A Sangma jegalatskaaha.
VPP-ni iandake matnanganina aganchakaniko on·angengon, je manderangan Bryan Adams-ni concert-ko ong·atanina matnangtokahachim, ua manderangni ripengskarang aro nokdangrangba ia mingsinggipa singer-ni gitrangko ring·anio dongpae niaha aro gitrangko ring·paaha ine Rakkam Sangma aganaha.
Iandakgipa concert-rangko ong·ataniara MDA sorkarini ning·o saknaa man·gipa manderangko namatanisan ong·aia ine VPP-ni aganahani gimin Education Minister, ia kattarangko aganskaaha.
Iandake a·gilsako mingsing minggamako man·gipa manderangni gitrangko ring·aniara Shillong songjinmako niksengatanisa ong·enga ine janapatskaengon, “A·gilsak gimikon Bryan Adams Shillong-ona re·bae gitrangko ring·e mesokangaha ine knasotokaha,” ine Sangma aganaha.
Iandakgipa concert-rangko jegalgipa manderangba Bryan Adams-ni gitko ring·a ine janapatengon, Meghalaya a·doko VPP sorkariko chalaina nanggenchimodee, Shillong Chamber Choir aro uandakgipa dolrangko git ring·e mesokna cholko on·genma on·jawa ine Sangma sing·doataha.
“Iandake matnanganiara a·dokni chadamberangna namen namja maina indakgipa concert-rangko ong·atanichisa a·dokni chadamberangkoba Bryan Adams gita ong·china didina man·a,” ine Education Minister parakataha.
Shillong songjinmako India a·songni Rock Capital ine biming donmanpilaha ine gisik ra·atpilaniko on·angengon, mikkangchi iandakgipa concert-rangko aro Bryan Adams-na batgipa artist-rangkoba Shillong-ona okamatna nangenga ine Sangma aganaha.
Iandakgipa rock concert-rangko ong·atanichi gipin biaprangoniba bang·en manderang re·batokenga aro a·doko hotel, homestay gita dakgipa bading chiwalanirangko dake cha·enggipa manderang bang·en namgnirangko man·enga ineba a·dokni Education Minister parakataha.
 |
ReplyForward
|