NEW DELHI: Meghalaya a·doko bading chiwalani aro chi gita re·a doani cholrangko tang·doatna man·na gitsa Umngot aro Kynshi chiringrango inland river port-rangko tarichina gita Budbar salo, Shillong-ni MP Dr Ricky Andrew J Syngkon, Union Ports & Inland Waters Minister Sarbananda Sonowal-ko didiangaha.
“Ia chiringrangara namen mongsonggipa biapo ong·genchimoba da·alonan ia chiringrangni namgnirangko jakkalna man·kujaenga. Ia chiringrango inland river port-rangko tarigenchimode ian ia jolrango bading chiwalani kamrangko tang·doatasan ong·aigija chi gita re·a doani cholrangko namdapatna dakchakaniba ong·genchim,” ine Union Minister-na sedoatgipa chittio Syngkon parakataha.
VPP MP-ni parakatani gitade, ia chiringrangko inland water port dake tarigenchimode ian ia jolrango chi gita re·a doani cholrangko namdapatan baksana gue, ma·manti bolam bite aro jolo game ge·e man·gipa bosturangko gipin biaprangona badingatanio bang·en dakchakani ong·gen.
Ia chiringrango river port-rangko tarigenchimode ian kamrangkoba nakatate on·na dakchakani ong·gen aro gipin biaprangoni dingtang dingtang company-rangna invest ka·ani cholrangko on·e a·dokna bang·en dakchakani ong·gen ineba Syngkon parakataha.
“Uni gimin National Waterways Act-ni ning·o chi gita re·a doani cholrangko tang·doatna ma·mong sorkari kam ka·engon, Umngot aro Kynshi chiringrangkoba river port dake tarichina anga mol·molenga,” ine Shillong MP, Union Ports & Inland Waters Minister Sarbananda Sonowal-na sedoatgipa chittio janapataha.
