SHILLONG: A·doko poraienggipa chatro-chatrirangko, a·dokni dingtang dingtang ku·sikrangko man·e ra·aniko Chief Minister Conrad K Sangma nangnikenga ine Mongolbaro aganaha. Class VIII-ona kingkingde Garo aro Khasi ku·sikrangko, chatro-chatrirangna nangchongmotgipa dakataniko ua nange nikenga ina CM aganaha.
Shillongo mingsa tom·anio aganengon, ku·cholsan ong·aniko rakkina gita Khasi chatro-chatrirangba A·chik man·e ra·na nanga uandaken A·chikrangba Khasi ku·sikko man·e ra·na nanga ine Pa Sangma aganaha.
Indake ong·engon, iani bidingo ja·ku de·na gita Education Department-sa nambatgipa gadango ong·gen ineba ua aganaha.
Iako dakengon namen rakbegipa aro ra·biani gnanggipa kam ong·gen ine aganengon, iako dakna gita skigiparangko skie tarigimin manderangko aro technology nanggen ine Chief Minister aganaha.
