SHILLONG: Meghalaya Public Service Commission (MPSC)-ni MCS mains result aro typist-na porikka ra·anio niam gita ong·ja ine matnangenggipani bidingo Khasi Students Union (KSU)-ni Employment Monitoring Cell (EMC), a·dokni Chief Secretary DP Wahlang-na badi ka·doangaha.
Iani bidingo a·dokni Chief Secretary-na badi ka·e sedoatengon, batanggimin somoirangonin dingtang dingtang kamna ra·anio rongtale dakchina MPSC-ko didiengachim indiba dingtang dingtang kamna porikkarangko ra·anio pangnan niamko ja·rikrongja ine KSU-EMC-ni chairman Reuben Najiar parakatenba, Commission-ni parak ong·e dakna a·kanganiara, kamna dorgasto galgiparangko togianisan ong·aia ine matnangataha.
Najiar-ni parakatani gitade, MPSC-ko namdapatna gita a·dok sorkari committee-ko songahachim indiba ia committee, MPSC-ko namdapatanio somoi ra·chae dongkuengachim.
MPSC mains porikkani result-ko ia bilsini December 6 tariko parakahachim indiba ia result-na bang·bata candidate-rangan suk ong·gijaniko paraktokahachim.
Iani bidingo an·tangni suk ong·gijaniko parakatengon, personal interview-na sak 89 candidate-rangko seokaha aro ianoni sak 9 ba una baten additional list-o ong·giparang ong·a ine KSU-EMC-ni chairman parakataha.
Additional list-o biming nakatgipa candidate-rangkode KSU matnangenga ong·ja ine talataniko on·angengon, ia candidate-rangko a·bachengo seokgija ja·man seokanide candidate-rangni dos ong·ja indiba Commission-ni dossa ong·a ine Najiar parakataha.
“Candidate-rangni a·kangani gitade, additional list-o pass ka·gipa candidate-rang indita bakkandikbegipa somoio porikkana tarisamsoanio namen neng·beani ong·achim indiba mains porikka pass ka·gipa candidate-rangni percentage-ko nigenchimode additional list-o biming nakatgiparangan original list-o biming donggipa candidate-rangna batpilaha,” ine Najiar parakataha.
Candidate-rangni badi ka·anirangko man·soani ja·man KSU, iani bidingo mikrake nirikkiengachim ine janapatskaengon, mitam candidate-rangde an·tangtangni cut-off mark-rangko ma·sina Commission-o bi·ahachim indiba uamangni bi·aniko Commission jegalaiaha ine Najiar parakataha.
Iani bidingo adita sak candidate-rangde RTI-na dorgasto galahachim indiba uamangni dorgastorangko ra·chakjaha aro RTI ka·jachina ka·mikkenataha ineba KSU-EMC-ni chairman parakataha.
Typistn-ni kamna porikka ra·gipani bidingo janapatskaengon, ia porikkani bidingo MPSC maming dongnuani gri jinmana parakna nanga ine KSU-ni dilgipa dabiangaha.
