SHILLONG: Meghalaya a·doko gimaangenggipa aro Tribal-rangni ku·sikrangko ripinge rakkian baksana ra·dona gita miksonganio, a·dokni Captain Williamson Sangma State University-o Tribal Studies Department-ko kuliaha.
Ia Tribal Studies Department-ko a·bachengatani bidingo a·dokni Education Minister Rakkam A Sangma, talataniko on·angengon, lekka porako on·anichi a·dokni man·e cha·begipa daka rikanirangko aro ku·sikrangko ripinganio sorkarini ka·enggipa kamrangni gimin aganangaha.
“Lekka porako on·anichi chinga jatni man·rikbaenggipa daka rikani aro ku·sikrangko ripingna kam ka·enga. Capt Williamson Sangma State University-o Tribal Studies department-ko bak ong·ataniara, Tribal-rangni ku·sikrangko ripingna kam ka·anio mongsonggipa ja·ku de·ani ong·enga,” ine Sangma aganaha.
Ia State University-ko nambate chalaina man·na gita mongsonggipa department-rangko bikotanio aro lekka porako on·anio kamrangko a·bachengatna gita Vice Chancellor-na daitorangko pakwataha ine janapatengon, re·baenggipa 2025 bilsionin class-rangko a·bachengatna aro college-rangko university-ni bak ong·atanio kamrangko a·bachengatna ka·dongenga ine Education Minister parakataha.
College-rangko ia State University-ni bak ong·atani bidingo janapatengon, “College-rangko bak ong·ate ia university-ko chalaina gita chinga nambatgipa cholrangko sandiengkua aro bakan chinga iani kamrangko matchotgnok,” ine Sangma aganaha.
Captain Williamson Sangma State University-ni campus-ko New Shillong Township-o kulina gita sorkari, a·arangko ra·na proposal-ko on·enga aro All India Council for Technical Education (AICTE)-ni ra·chakaniko man·na gita krenge kamko ka·enga ineba Education Minister parakataha.