SHILLONG: Meghalaya a·dokni Mawjymbuin cave ba rong·kolo Hindurangni olakkianiko champengatahani gimin dingtang dingtang Hindu dolrang, mongsongbate Assam-ni Kutumba Suraksha Parishad (KSP), December-ni 24 tariko, Byrnihat-o rama champenge jingjengatna tik ka·angaha.
Mawjymbuin cave-o Hindurangni olakkianiko champengatahani gimin, iani bidingo dingtang dingtang dolrang baksa agangrike, Mawjymbuin cave-ko Hindurangna olakkina gita oe on·pilchina KSP dol, Meghalaya sorkarina sal 15 somoiko on·e December 23 tarikkon bon·kamgipa tarik dake parakatahachim.
Indake ong·genchimoba da·alona kingkingan ia Mawjymbuin cave-ko Hindurangna olakkina gita oe on·pilkujaengani gimin KSP, gipin dolrang baksa December 24 tariko, Ri Bhoi a·jani Byrnihat-o rama champenge jingjengatskana tik ka·angaha.
Indian Constitution-ni Article 51 (A)-o pangchake uamang jingjengatna gita bilrang donga ine janapatengon, “Meghalaya a·dokni dingtang dingtang dolrang baksa tom·e agangrikna gita chingna somoi aro biapko tik ka·e on·china ian chingni Meghalaya sorkarina bon·kamgipa u·iatani ong·enga. Chinga a·songni on·gimin niam bidiko pangchakesa ia ja·kurangko de·enga. India a·songara democratic a·song ong·ani gimin chinga a·songni je biapoba jegalanirangko dakna bil donga. Uni gimin iani bidingo kamrangko niatchina chinga Meghalaya a·dokni Chief Minister Conrad K Sangma-ko mol·molenga aro Hindu-rangni kosako champenganiko December 23 tarikni gisepo ra·galpiljagenchimode December 24 tariko chinga, Sanatani Jagrata Prahari aro Hindu Suraksha Sena baksa nangrime Byrnihat-o ramarangko champengatgen,” ine KSP-ni dilgiparang mikrakataniko on·angaha.
