TURA: Re·anggipa December-ni 21 tariko ong·atanggipa jinma tom·bimonganio uko secretary-ni kamna susana gita biming mingaha ine skulo poraienggipa chatro chatrirangni pagipa saksa a·kangatani ja·man Rajabala Higher Secondary School-ni School Managing Committee (SMC)-na dongimin term-ni bidingo SMC-ni secretary talataniko on·atskaaha.
Iana skang, Enamul Hoque minggipa mande saksa, da·o gital SMC-ni election-ko ong·atanio an·tangko secretary-ni kamna susana gita adita sak manderang biming mingaha ine a·kangatahachim. Ia SMC election-na uni bimingkoba secretary-na ra·chakchina gitaba ua DSEO aro gipin sorkari official-rangkoba didiatahachim.
Uni iandake a·kanganina talataniko on·angskaengon, da·o ong·enggipa SMC-ni term 2025 bilsini August 29 tarikonan dongkugen aro ia SMC-ko 2022 bilsini August 30 tarik dipet bilsi gittamna songaha ine High Court-ni on·gipa ge·etani baksa da·o ong·enggipa SMC-ni secretary Hadisul Islam parakatskaaha.
Ia order ba ge·etaniko High Court-ni 2021 bilsini October 7 tariko on·gipa ge·etanio pangchake West Garo Hills a·jani DSEO, 2022 bilsio on·ahachim.
