SHILLONG: Re·baenggipa February 21 tariko ong·atna sienggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-o susana gita National People’s Party (NPP), gipin sakdok candidate-rangko parakdapataha.
NPP-ni ia sakdok candidate-rangara, JHADC election-o susana sienggiparang ong·a ine parakataha.
NPP-ni parakatgipa sakdok candidate-rangara, Saphai constituency-na Remdorkupar Lyngdoh, Mawkaiaw-na Warmanship Shadap, Jowai North-na Dr Dashemlok Isniaw Kjam, Sumer-na Krison Langstang, Saipung Nongkhlieh-na Aibor Hima Darnei aro Narpuh constituency-na Daiapher Lamare ong·a.
Da·o dipet NPP, JHADC election-na sak 26 candidate-rangko aro KHADC election-na sak 18 candidate-rangko parakataha.
KHADC aro JHADC election-na bangki candidate-rangko re·baenggipa January 10 tariko parakatgen ineba NPP-ni dilgiparang u·iataha.
NPP-oni kobor on·ani gitade, ia bangki dongkuenggipa constituency-rango susana sikenggipa candidate-rang bang·ani gimin tikitko on·anio name kamrangko ka·na nangengani a·sel ia constituency-rangna candidate-ko seokanio uamang somoiko ra·na nangnikkuenga.
“Ia District Council election-o NPP-ko chegipa ong·atna gita chinga pilakkon bakrime kam ka·china nangnikenga,” ine NPP-oni kobor on·timgiparang parakataha.
