TURA: Jisu Kristoni atchiani salko gisik ra·e a·gilsak gimik manitokengon ia salko Garo Hills-oba tom·tombee aro ka·srokbee manderang maniangtokaha.
Ia Krismasni salko nichaksona gita Garo Hills-ni pilak biaprangon December 24 tarik walonin giljarangko ka·e Isolko olakkiangaha aro uandaken December-ni 25 tarik pring aro attamoba dingtang dingtang mondolirang giljarangko ka·e Isolko olakkiangaha.
December-ni 25 tarik pringo Garo Hills gimikon Isolko olakkina gita giljarangko ka·angaha aro gilja jokani ja·mano bang·bata mondoli aro gittimrangon jinma kusi ong·e cha·rim ringrimanirangkoba nikna man·angaha.
December-ni 25 tariko jinma cha·rim ringrimna choljokgijagipa manderangba dingtang salona somoiko donatskae, gittimtangtango ba songtangtango apsan daken jinma tom·e cha·rim ringrimanirangko dakangtokaha.
Batanggimin bilsirango dakronga gitan ia bilsioba dama doke aro git wate chrok mesaanirangko Garo Hills gimikon nikna gita man·angaha aro ramarango manderangni git ring·e aro git wate re·ramanirangkoba nikna man·aha.
Garo Hills-ni bang·bata biaprangon, jinma cha·rim ringrimanirangko dakani ja·man pandalrango jinma wal·tim so·e, songkritan chrokanirangkoba nikna man·aha.
Ia chang Garo Hills-o Krismasna decoration ba taritilonganirangkoba bang·bate nikna man·aha aro mongsongbate district headquarter-rango light-rangchi ga·subee teng·atanirangkoba nikna man·aha.
Tura-oba ia chang light-rangchi teng·ate taritilonganirangko bang·bate nikna man·aha. Tura-ni DC office, Dakkopgre-o donggipa PA Sangma Stadium rama aro uandaken dingtang dingtang biaprango ga·subee light-rangchi taritilonganirangko ia chang nikna man·aha.
Garo Hills gimikon manderang kusi ong·e Krismasko manitokahaoba badiaba badiaba biaprango gari a·sel ong·anirangkoba knasona man·skaaha aro ian mitamrangnade kalimani salba ong·skaaha.