SHILLONG: Meghalaya a·doko chatro chatrirangko poraianio gisik nangdapatna gita a·dokni Education Department, skul ge·antion pringni tom·ani ba assembly session-o chukalgipa class-rangni chatro-chatrirangko songbad poraijringatchina u·iataniko on·angaha.
Skulni assembly-rango songbad poraianiko ranta ka·atna nangchongmota ine janapatengon, chatro-chatrirang skulo skie ra·an baksana a·gilsako ong·enggipa obostarangko u·i-ma·sie ra·anichi an·tangtangni gisikrangko bariatna man·an baksa aganani bewaloba namgipa gadango ong·gen ine Education department talataha.
Right of Children to Free and Compulsory Education (RTE) Act, 2009-ni Section 24 (e)-o pangchake skul ge·antian ma·gipa pagipa baksa tom·anirangko ong·atjringenba uamangni dedrangni attendance, skie ra·ao neng·nika nengnikgijako, class-o baditana u·ienga, uarangko ma·a-paarangna talatchina gitaba Education department janapangaha.
Una agre apsankon skie ra·enggipani ma·a-paarang baksa result-ni saloba dakangkuna Education department didiangaha.