SHILLONG: Meghalaya a·dokni dingtang dingtang biaprango, mongma aro manderangni gisepo nanggrikanirang batroroenganiko nikna man·engon, niam gri mongma so·otanirangkoba bang·en nikna man·skaenga.
Ministry of Environment, Forest and Climate Change (MoEF&CC)-ni see rakkianiko parakani gitade, 2019 bilsioni 2023 bilsiona Meghalaya a·doko mang 14 mongmarangko niam gri so·otani gimin case segataniko nikna man·aha aro ian India a·songo bang·batsranggiparangoni gnigipa ong·enga.
Ia bilsirangni gisepo India a·song gimiko mang 50 mongmarangko niam gri so·otanina case segataniko nikna man·aha aro ianoni 28 percent-de Meghalaya a·dokon ong·a.
Meghalaya a·dokni ja·man Odisha-o ming 17 case, Tamil Nadu-o ming 10 case-rangko report ka·skaaha aro Assam, Kerala aro Nagaland gita dakgipa a·dokrangode minggitam ba una bate case-rangko report ka·skaaha.
Meghalaya a·doko mongma aro manderangni gisepo nanggrikanirang batroroengani a·selba mongma so·otani case-rang bataha ine official-rang u·iataha.
Koborko on·ani gitade, 2009 aro 2021 bilsini gisepo mongma aro manderangni gisepo nanggrikani ming 10,500-na baten case-rangko report ka·aha aro iani a·sel sak 66 manderang so·otako man·an baksana sak 50 manderang saknaaniko man·na nangaha aro bang·a manderangan an·tangtangni bagan barirangko gimaatna nangaha.
Mongmarangni dongchakgipa biaprango manderang napdrae songdong a·chaani aro bagan barirangko dakani a·selba mongma aro manderangni gisepo nanggrikanirang batroroenga ine official-rang aganaha. Unbaksana buring bolgrimrangni porongrong ong·angani, buring bolgrimrango a·ningni ma·manti bosturangko bikotani a·selba mongmarang da·o manderangni dongchakenggipa biaprangona re·bana draatako man·skaengaha ineba official-rang u·iataha.
2017 bilsini census data-o mesokani gitade, Meghalaya a·doko, mongsongbate Balpakram National Park aro Khasi Wildlife Division-ni ning·o kraa gitan mongmarang dongachim indiba ia mongmarangni dongchakgipa biaprangko aro mongmarangni re·ruragipa ramarangko taridapanirang dongskajahachim.
South Garo Hills-o iandake mongmarangni ma·brangengani a·sel bang·en gama ge·anirang nosto ka·ako man·ahaon Khasi Hills-oba da·o mongma aro manderangni gisepo nanggrikanirang batrorobaenganiko nikna man·engaha ine official-rang parakataha.
Meghalaya aro Bangladesh a·songni gisepo mongmarang re·rurarongani a·sel, ia jolrango manderangni bagan barirang nosto ka·ako man·enga aro dolgnini gisepo nanggrikanirangkoba nikna man·enga ine official-rang aganaha.
