SHILLONG: Re·baenggipa February jani 21 tariko ong·atenggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-o National People’s Party (NPP), tangka aro bilko jakkale susagenchimoba manderangni jegalaniko man·gen ine Opposition Congress dol parakataha.
“Election-ode sorkariko chalaienggipa dolrang, pangnan tangka aro bilrangko jakkalna jotton ka·aigen maina uamang pangnan tangka aro bilrangchisa election-ko chena susaronga,” ine Meghalaya Pradesh Congress Committee (MPCC)-ni president Vincent H Pala aganaha.
KHADC aro JHADC election-ode NPP chena gita namen neng·ani ong·gen ine janapatengon, “Manderangko tangkachi ropna aro brena man·aigen ine uamang (NPP) chanchienga indiba da·o ong·enggipa sorkarini kamrangko Meghalaya a·dokni manderang namniktokjaha. Ia election-o dilsretgipa aro tangka jakkalsretgipa sorkariko skiani somoi ong·aha ine uamang ma·sigen,” ine Pala aganaha.
NPP-ni dakchakani gride darangba district council-rango Executive Committee (EC)-ko chalaina man·jawa ingipa gitasa NPP-ni dilgiparang agantokenga ine janapatengon, “Uamangni aganani bewalrangan iarangni sakkirang ong·a. Uamang tangka aro muscle-ni bilosa pangchaktokenga,” ine MPCC president matnangataha.
NPP-ni mitam candidate-rangde ia district council election-o an·tangtangni skani gita susajenga aro mitam candidate-rangde Independent candidate ong·e susana tik ka·tokaha ineba ua aganaha.
Autonomous District Council (ADC) election-ko chegipa darang dolan National People’s Party (NPP)-ni bakrimani gride Executive Council (EC)-ko rikna man·jawa ine adita salrangna skangsan, NPP-ni dilgipa aro a·dokni Cabinet Minister Ampareen Lyngdoh a·kangatahachim.
“Ia sal somoirango pilakan ding·chaoatako man·tokenga gita nika indiba somoi sokahaosa an·ching obostarangko ma·sigen. MDA-o da·o bilsi gittam somoi dongkuengani gimin darangba chingko onnikna man·jawa. District council election-o sawa chea uade maming ong·ja indiba na·a sorkariko chalaienggipa party baksa apsan bakrimjaenga ong·ode Executive Council-ko chalaianio bang·e tangbangjawa,” ine Lyngdoh aganahachim.
KHADC aro JHADC election-ko Voice of the People’s Party (VPP)-ni chegopna ka·dongsotokengani gimin ua ia kattarangko aganahachim.
