BOKO: Bristibar salo, Gijang Area A·chik Cultural Arts & Sports Association-ni gita chetgipa changna songkritan chroksusaaniko, Assam aro Meghalaya simani West Khasi Hills a·ja ning·o donggipa Umshek songni kal·chakramo ong·atangaha aro ia songkritan susaaniko ong·atanio, Rambrai-Jyrngam constituency-ni MLA Remington G Momin, mongsonggipa sokgipa ong·e bak ra·angaha.
Songkritan susaaniko a·bachengna skang, songni chadamberang, dingtangmancha Wangale mesokangaha.
Ia program-ko ong·atanio, Rambrai-Jyrngam MLA Remington Momin, jinmana aganprakangengon, ia Songkritan chrokaniara A·chikrangna mingsa mongsonggipa chrokani ong·a aro iandakgipa program-ko ong·atanichi jatni gisepo tom·tomani aro meli-nangrimaniko ra·bana man·a ine aganangaha.
“Batanggimin somoirangoba dingtang dingtang A·chik songrango iandakgipa songkritan program-ko ong·atanichi A·chikrangni gisepo ku·mong nangrimani aro meli-nangrimaniko ra·bana man·aha aro jatna bang·en namgnirangko ra·baaha. Uni gimin ia songkritan program-ko an·ching bilsiantian ong·atenga,” ine Momin aganaha.
Ia jolrango Songkritan chrokani program-ko gital bilsio ong·atronga ine janapatengon, “Ia bilsio anga songni manderang baksa ia songkritan choksusaaniko ong·ataha aro Gijang jolo donggipa dingtang dingtang songrangkoba ia chroksusaanio bak ra·china didiaha. Uandaken ia chroksusaanio dingtang dingtang songrangoni jekai, Maspara, Malapara, Khasi Salbari, Malsapara, Athiabari, Ranikhat, Dogaon-Malang, Umshek, Madankillor aro Rongdhali songrangoni gimik dol 10 chrokgiparang bakko ra·enga,” ine Rambrai-Jyrngam MLA parakataha.
Songkritan chrokaniara A·chik Kristianrangni daka rikaniko mesokani aro Wangala chrokaniara A·chikrangni daka rikaniko mesokani ong·a ineba ia tom·anio Momin talataniko on·angaha.
“Anga ka·donga mikkang bilsirangode iandakgipa songkritan program-rangko ong·atanio, ia jolrango donggipa A·chik manderangna Assam aro Meghalaya sorkarirang dakchake on·gen,” ineba ua an·tangni ka·dongchakenganiko parakataha.
Ia Songkritan chroksusaanio skanggipa boksisko Ranikhat cheaha, gnigipako Maspara aro gittamgipa boksisko Dogaon song cheangskaaha.
Re·anggipa bilsini Songkritan chroksusaaniko Malapara cultural dol cheskaahachim ine nikna man·a.