NPP-ko seoktaiode district council-rangko bak dakani chol donga: Saleng

SHILLONG: Re·baenggipa February jani 21 tariko ong·atna sienggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-o National People’s Party (NPP)-ko seoktaia ong·ode Meghalaya a·dokni manderangna dal·bea gimaani ong·naba gnang maina NPP-ni dilgiparang, Tribal-rangko chel·chakna on·gimin autonomous district council (ADC)-rangkon bak dakani cholrang donga ine Tura-ni Congress MP Saleng A Sangma matnangataha.
“District council election-o NPP-ko seoke, executive committee (EC)-ko rikpiltaina chol on·genchimode a·dokna gimaani ong·naba gnang maina uamang (NPP) gipin biaprangoni manderangnasa cholrangko on·batenga,” ine Sangma aganenba, gipin biaprangoni private investor-rangna biap para on·aniko bilsi 30-oni bilsi 60-ona bariatanian NPP-ni gipin manderangna mikkang niteaniko mesokani ong·a ine parakataha.
Iandake gipin biaprangoni re·baenggipa manderangna mikkang niteaniara a·dokna namen kenna nangani ong·enga ine janapatengon, district council election-o NPP-ko seoktaia ong·ode, ADC-rangkon bon·atani cholrang donga ine Sangma matnangataha.
ADC-rangko an·tangtangni gam-jin dake jakkalenga ine NPP-ko matnangatengon, Meghalaya a·dokni manderang, NPP maiko dakna miksongenga pilakan ma·sitokaha ine Tura MP parakataha.
“A·dokni manderang CAA, ILP aro gipinrangni bidingo talen ma·sia aro ia pilakan manderangni jakosa ong·enga,” ine Sangma aganenba, iandakgipa kamrangni bidingo Congress dol, manderangna kakketko agane on·nasa nangaia aro mikkangchi manderangni jako pakwate on·anian ong·enga ine parakataha.
Da·o dipet Congress dolo MLA aro MDC-rang bang·gijasan dongaiahani gimin maikai election-na tarisamsona miksongenga ine sing·anina aganchakaniko on·angengon, adita salrangna skangsan gitcham MLA aro MDC-rang bang·en Congress dolo napaha aro ia pilakan uamangni gipin party-rango ka·dongna man·gijaniko aro Congress dolo ka·dongna man·aniko mesokanian ong·enga ine Sangma aganaha.