SHILLONG: Meghalaya a·doko Tribal manderangko chel·chakenggipa Autonomous District Council (ADC)-rangko tangbange rakkiangna aro bilakbatatna gita kamko ka·gen ine Sukrobar salo, National People’s Party (NPP) ku·rachakaniko on·angaha.
Re·baenggipa February jani 21 tariko ong·atna sienggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-o NPP-ko seoktaia ong·ode Meghalaya a·dokni manderangna dal·bea gimaani ong·naba gnang maina NPP-ni dilgiparang, Tribal-rangko chel·chakna on·gimin ADC-rangko bak dakani cholrang donga ine Tura-ni Congress MP Saleng A Sangma-ni agananiko jegalatengon, “Ian politics-ni gita agananisa ong·a aro iako chinga maming dakeba ra·chakna man·jawa. Chinga maikai district council-rangko bon·atgen ine aganna man·a? Tribal-rangko chel·chakna dongimin bimangrangko chinga mande ra·a aro ia skango gitan dongaigen. Batesa chinga district council-rangko nambatatna jotton ka·gen aro ian chingni ku·rachakaniba ong·a,” ine a·dokni Cabinet Minister aro MDA-ni ku·wattimgipa Marcuise N Marak aganaha.
District council election-o NPP-ko seoke, executive committee (EC)-ko rikpiltaina chol on·genchimode a·dokna gimaani ong·naba gnang maina uamang (NPP) gipin biaprangoni manderangnasa cholrangko on·batenga ine Bristibar salosan Tura-ni MP Saleng A Sangma aganahachim.
Maio pangchake Tura-ni MP ia kattarangko aganaha ua an·tangde ma·sija ine janapatskaengon, “Ia kattarang kakket ong·ja aro ua an·tangsa maio pangchake iako aganaha ukode ma·siaia. Indiba NPP-de Meghalaya a·dokni manderangnan ong·a aro chinga gitcham dilgiparangni bikote donanggipa institution-rangko ripingna aro nambatatna jotton ka·gen,” ine Marak aganaha.
Sana pu·ongen uade manderangni skaniosa ong·aia ine janapatskaengon, NPP-ba political party ong·e ia election-o candidate-rangko susaatgen aro manderangni chakpaanirangko am·gen ine NPP-ni Cabinet Minister parakataha.
ADC-rangko an·tangtangni gam-jin dake jakkalenga ine NPP-ko matnangatengon, Meghalaya a·dokni manderang, NPP maiko dakna miksongenga pilakan ma·sitokaha ine Tura MP Saleng Sangma aganahachim.
“A·dokni manderang CAA, ILP aro gipinrangni bidingo talen ma·sia aro ia pilakan manderangni jakosa ong·enga,” ine Sangma aganenba, iandakgipa kamrangni bidingo Congress dol, manderangna kakketko agane on·nasa nangaia aro mikkangchi manderangni jako pakwate on·anian ong·enga ine parakataha.
