SHILLONG: Umroi Constituency Progressive Forum (UCPF)-ko songaoni da·o jasa gapsrangkujaon dolo meligijani ong·kataha, jeon saksa gitcham MDC MD Syiem, jekon ia Khasi Hills Autonomous District Council (KHADC) election-o uamangni forum-na chakpagen ine ka·dongachim, ua da·o Congress party-o napna gita doloni ong·kataha.
MD Syiem, UCPF-ni saksa a·gipi membor ong·achim forum-ni working president-ba ong·achim. Indake ong·engon, ia District Council poll-o Umroi constituency-ni gitcham MLA George Lyngdoh-ko forum-ni gita candidate ong·e susaatna miksongengani gimin Syiem, forum-oni ong·katna chanchiaha.
Congress, niam gita Umroi Umdohbyrthih-o dingtangmancha tom·aniko ong·atenba Syiem-ko party-ona rimchaksoaha. Ia tom·anio, Meghalaya Pradesh Congress Committee (MPCC), Ri-Bhoi District Congress Committee aro Umroi Block Congress Committee-ni representative-rang bakko ra·aha.
Umroi constituency-na dingtangmancha miksongenba gitcham Umroi MLA George Lyngdoh-ni dilanio bang·a Trinamool Congress memborrang ong·katgrimenba re·anggipa December 9 tariko ia UCPF-ko songahachim. Antisana skang mangmango Lyngdoh indake parakatengachim je, UCPF-ko Congress-o bakrimchina aganahachim indiba uamangoni chel·e dongna gita mol·molaniko ra·chakjaha.
Unomitingo, Syiem uni apjitani bidingo da·o dipet mamingkoba koborna paraka dongkuja. UCPF-ni ning·oniko kobor man·soani gitade, uamangni gisepo candidate-ko seokanio pilakan ku·cholsan ong·a. UCPF, MDC election-o susana gita sakbri manderangni tikitna dorgasto on·anirangko man·soaha, uamangara Lyngdoh, Syiem, John Syiemiong aro Iaishah Rymbai mang ong·achim. Indake che·em che·em chanchirimaniko dakani ja·mano UCPF election committee, Lyngdoh-kon party candidate dake susaatna gita tik ka·aha.
An·tangna tikit on·jani gimin dolo chanchianirangko chu·songnikjaenba Syiem, UCPF-oni ong·katahakon ineba parakaha.
