SHILLONG: Re·baenggipa February jani 21 tariko ong·atna sienggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-o Hill State People’s Democratic Party (HSPDP), West Khasi Hills a·jao seat-rangko bang·bate chena ka·dongenga.
Ia district council election-o HSPDP, constituency gimiko susagija badiaba badiaba constituency-rangosan candidate-rangko susaatna miksongengachim.
“Oe chinga constituency-rangko nirokesa candidate-rangko susaatenga aro ia election-o chinga West Khasi Hills a·jao seat-rangko bang·bate chena ka·dongenga. East Khasi Hills a·jaoba chinga bewal seat-rangkon chena ka·dongenga indiba West Khasi Hills a·jao bang·bate seat-rangko chena ka·dongenga,” ine HSPDP-ni general secretary Panbor Ryntathiang aganaha.
KHADC aro JHADC election gimiko badita seat-rangko chena ka·dongenga ine sing·anina aganchakaniko on·angskaengon, “Chinga ia election-o name dakna ka·dongenga indiba badita dam seat-rangko chegen da·o dipet iako agannade seng·gnangdugakuenga,” ine Ryntathiang aganaha.
District council election-na HSPDP-ni gnigipa candidate list-ko re·baenggipa antio parakatgnok ineba ua aganaha.
“District council election-na chinga campaign ka·chichana a·bachengataha aro pilak candidate-rangan, an·tangtangni constituency-rango rakbee kamrangko ka·sotokengaha,” ine ua aganaha.
Pilak constituency-rangode candidate-rangko susaatjana tik ka·ani gimin talataniko on·angengon, “Je biaprangon chinga grassroot worker-rang bilakbata uandakgipa constituency-rangosa chinga candidate-rangko susaatenga. Je constituency-rangon chinga bilakbreja, uandakgipa constituency-rangode chinga candidate-rangko susaatanio neng·ani ong·a. Uni gimin chinga constituency-rangko nigrikesa ia election-o candidate-rangko susaatenga,” ine HSPDP-ni general secretary parakataha.
UDP aro HSPDP dolrangni nangrime bikotgipa Regional Democratic Alliance (RDA)-ni gisepo maming ma·sisretgrikanirang dongja aro ia district council election-o dolgnini dilgiparangan, an·tangtangari susana tik ka·aha ineba Ryntathiang talataniko on·angaha.
