NE-o game ge·e cha·giparangna dakchakchina ma·mong sorkariko Ampareen didia

SHILLONG: India a·songni salgro salaram a·dokrango game ge·e cha·enggiparang, a·songni gipin biaprango an·tangtangni game ge·e man·gipa bosturangko palna sim·na man·jae neng·nikanirangko chagrongna nangtokengani gimin game ge·e man·gipa bosturangko badinganio dakchakanirangko on·china gita a·dokni Agriculture Minister Ampareen Lyngdoh, ma·mong sorkariko didiataha.
“An·chingni game ge·e cha·gipa manderang, korosrangni a·sel a·songni gipin biaprango an·tangtangni game ge·e man·gipa bosturangko palna sim·na man·jaenga. Uni gimin bosturangko pala sim·anio game ge·e cha·giparangna dakchakanirangko on·na man·genchimode game ge·e cha·giparangna bang·a dakchakani ong·genchim,” ine Lyngdoh, Union Agriculture & Farmers Welfare Minister Shivraj Singh Chauhan baksa video conference gita agangrikanio parakataha.
Meghalaya a·doko man·gipa mi-misi, bolam bite aro Lakadong holdirangko ripingna aro tang·doatna gita tangka paisarangko on·e dakchakna Indigenous Crop Conservation Fund-ko bikotanio dakchakaniko on·china gitaba Lyngdoh, ma·mong sorkariko didiataha.
Meghalaya a·doko High-Altitude Farming Innovation Center for research and training hub-ko kulichina gitaba a·dokni Agriculture Minister, ma·mong sorkariko didiataha.
Forest-Farming Integration Policy-ni bidingo janapatengon, gama ge·anio jakkalgipa a·arangko apjitanio a·arangni nosto ong·aniko champengna gita ia project-ara mongsonggipa bak ong·a ine Lyngdoh aganaha.
Livestock for Marginalised Farmers Program-ni bidingo ku·pattianiko on·angskaengon, cholgri ong·gipa manderangni man·gnirangko bariatna gita do·bok, wak aro uandakgipa jilla kaanirangko dake cha·na tangka paisarangko dakchake on·china a·dokni Agriculture Minister didiataha.
Agriculture sector-o namdapataniko ra·bana man·na gita Sonibar salo, Union Agriculture & Farmers Welfare Minister Shivraj Singh Chauhan, dingtang dingtang a·dokni Agriculture aro Horticulture Minister-rang baksa video conferencing-ko dakanichi tom·aniko ong·atangahachim.