TURA: Re·anggipa Robibar walo, East Garo Hills a·jani Williamnagar samba jolo donggipa Dawa Nengatokgre songo, bijolini a·sel te 13 dokkanrangko bon·pile wa·al kamaha.
Koborko on·ani gitade, ia dokkanrangko wa·al kamani bidingo Robibar walni 11:44 bajimango, East Garo Hills a·jani police-rangna kobor on·ataha aro ja·mano bakan Fire & Emergency Service-ni sipairang, ua biapona re·ange, wa·alrangko kimitna jotton ka·eaha.
Wa·al kamgipa biapona Fire & Emergency Service-ni manderang sokangon, ua biapo donggipa dam 13 dokkanrangko wa·al kamsomanaha ine nikeaha.
Ia dokkanrango kamenggipa wa·alrangko kimitna jotton ka·beahaoba wa·alko Sombar pringwalni 1:50 bajimangosa kimitna man·aha indiba ua somoio dokkan pilakkon chu·gimik wa·al kamsomanahachim.
Ia a·sel ong·anio darangba saknaanirangkode man·jaha.
Ia dokkanrangoni damsao bijoli short ong·ani a·selsa wa·al kamchakatahakon ine police-rang chanchichipenga.
