SHILLONG: Da·ororo India a·song gimikon Human Metapneumovirus (HMPV)-na kenjagokanirangko nikna man·engon, ia HMPV-de COVID-19 gita kenna nanggipa sabisi ong·ja aro da·o dipet Meghalaya a·doko HMPV-ko man·gipa manderang saksaba dongkujani gimin iana kenjagokna gita nangjawa ine Budbar salo, a·dokni Health official-rang talataniko on·angaha.
Mongolbar salo, Health Expert Committee baksa tom·e chanchirimani bidingo talataniko on·angengon, salgni skangsan uamang ma·mong sorkarini u·iataniko man·soenba Health Expert Committee baksa tom·e, ia HMPV-ni bidingo chanchirimangaha aro da·o dipet Meghalaya a·doko ia HMPV-ko man·giparang dongkujani gimin jajrengna nanganirangba dongkuja ine Budbar salo, Health department-ni Principal Secretary Sampath Kumar parakataha.
Kumar-ni talatani gitade, ia HMPV sabisiara gusu-sordi dakgipa sabisisa ong·aiani gimin ramram sabisi gitasan ong·aiachim.
“Meghalaya a·doko HMPV batrikrikna nanganirangona chinga tarisamsoanirangko dakenga indiba HMPV-de COVID-19 gita mandeko siatgipa ong·jani gimin inditana kenna nanggipa sabisi ong·ja. HMPV-ko man·e saa bilongna nanggenchimoba uan pneumonia ba bronchitis-kosan ong·atna man·aia indiba COVID-19 gita ta·rake batrikrikgipa ong·ja. Sabisini batrikrikaniko champengna gita mask-rangko ganjringchina aro jakrangko rongtale rakkichina health department, a·doko songdongenggipa manderangna ku·pattianirangko on·manaha. Saoba fever aro rang·sitanio neng·nikaniko man·e sagenchimode, uamang an·tangtangko simsake rakkina nanga aro chel·chakanirangko dakna nanga,” ine Kumar aganaha.
HMPV-de COVID-19 gita bilakgipa sabisi ong·ja ine talataniko on·angskaengon, “Ia HMPV aro COVID-19 minggnian rang·sitanio neng·nikaniko ong·ata indiba COVID-19 sabisiara ta·rakbate saksa sakgipinona batrikrika aro oxygen baksana bilongbate simsakaniko nangbata. HMPV-de inditana bilakgipa sabisi ong·ja aro nambate nirok sandianiko on·na man·skaaia,” ine Health department-ni Principal Secretary parakataha.
Kumar-ni aganani gitade, HMPV-na simsakaniara sordi-gusu man·ani somoio simsak-nirokaming apsanangaia indiba sabisini batrikrikaniko champengna gita mask-rangko ganjringna nanga aro jakrangko rongtal an·tale rakkina nanga.
“Ia HMPV-de kenna nanggipa sabisi ong·breja aro bang·a changon paracetamol gita dakgipa samrangchin namna man·aia. Manderangna health department mikrakatanirangko on·samsoenga indiba da·o dipet iana kenna nangani dongja,” ine ua aganaha.
Indake ong·genchimoba, ia sabisini bidingo manderangna u·iatna nangenga aro tarisamsoe dongna nanga ine Health department-ni Principal Secretary aganaha.
